Uzye mungakunda ukuvwambilizizyapo ivyewo na vinji pa kuti mumanyilepo ivivule pa vya mu Baibolo? Uzye mpamwi mukalonda ukumanya icete cete iwaliko limwi nanti umuntu, nanti icifulo cimwi nanti icili consinye cimwi cino walumbula mu Baibolo? Nanti mpamwi mukalonda ukumanya nga cakuti Izwi lya kwe Leza lingamyavwa pe vino vikamisakamika? E laibulale yino yawa pa Ng’anda ya Wufumu yingamyavwa nkaninye.

Mwawa amabuku yano yangamyavwa ukuvwamba ivyewo. Kweni, mutanga mukwate wamagazini na mabuku yonsinye aya Nte zya kwe Yehova mu lulimi lwinu. Lelo mwe laibulale yino yawa pa Ng’anda ya Wufumu mweni mukawa amabuku na wamagazini awa nombanye. Mumwi mukawa na maBaibolo amalekanelekane, amadikishonali amazima nkaninye nga na mabuku yanji ayakumyavwa ukuzana ivyewo vimwi. Mungawomvya ya-a amabuku yano yawa mwe laibulale pano mutani mutalike ukulongana na pansizi ya kulongana. Nga cakuti wawikamo ne kompyuta, mpamwi mungazana wawikapo ne Watchtower Library. Pe yonye e laibulale, pawa e programu yimwi yino yikatwavwa ukuzana ivyewo ivivule nkaninye pa mpindi nticinye, nampo nga acipande, iwaliko nanti izwi limwi.

Ikakwavwa sana wano walembesya mu Kulongana kwa Mikaliile nu Mulimo Wuno Tukawomba. Pa kupekanya amalyasi, mungawomvya e laibulale yino yawa pa Ng’anda ya Wufumu. E kangalila wa Kulongana kwa Mikaliile nu Mulimo Wuno Tukawomba awino akalolecesya pe yo-o laibulale nu kusinincizya ukuti muli amabuku na wamagazini awa nombanye swinya nu kusinincizya ukuti amabuku yonsinye yatantisilwe icete. Nga mukulonda ukuvwambako ivyewo vimwi, wino akamisambilizya Baibolo nanti e kangalila wa Mikaliile angamilanjizya ivya kuvwamba. Lelo mutazipizile ukusenda icili consinye ukufuma mu laibulale. Tufwile nu kusunga icete sana ya-a amabuku, swinya tutafwile nu kulembalembamo ivili vyonsinye.

E Baibolo ikalondolola ukuti pa kuzana ivyewo vino vingatwavwa “ukumanya Leza,” tuzipizile “ukuvivwambavwamba ngati avyuma ivizike.” (Imilumbe 2:1-5) Pa kuvwamba vyovyo ivyewo, muwawomvya e laibulale ya pa Ng’anda ya Wufumu.

• Avyani vino vyawa mu laibulale ya pa Ng’anda ya Wufumu vino mungawomvya pa kuvwambilizya ivyewo?

• Uzye awaweni wano wangamilanjizya ivya kuwomvya icete e laibulale?