¿Tikonuelitaskia okachi tikonixmatis tein tamachtia Biblia? ¿Tikonnekiskia okachi tikonixmatis se tajkuilol, oso se aksa oso teisa tein mochiuak tein ika tajtoua iTajtol Dios? ¿Tionmotajtaniani ox iTajtol Dios uelis mitsonpaleuis keman tikonpias se kuejmol? Komo ijkon, uelis tikontekitiltis amaixmej tein moajsij itech Kali kampa tiMosentiliaj.

Ompa tikajsiskej miak taman tein ika uelis timomachtiskej. Uelis tejuatsin amo tikonpias nochi amaixmej tein kitekitiltiaj itaixpantijkauan Jiova itech motajtol; sayoj ke, itech Kali kampa tiMosentiliaj moajsij miak amaixmej tein yankuixtok kiskej. Xa no ompa uelis moajsiskej okseki tataman Biblias, uan okseki taman amaixmej tein techpaleuiskej tikajsiskej miak taman. Uelis tikontekitiltis nejon amaixmej achto ke peuas uan satepan keman tamis tonechikoluan. Uan komo onkak se computadora, xa uelis kipias Watchtower Library, tein kipia miak amaixmej uan amo ouij se kitekitiltia, uan ijkon se kitemoua se tamachtilis, tajtolmej oso se tajkuilol tein mokixtia itech Biblia.

Semi kinpaleuia momachtianij itech nechikol Tonemilis uan toTanojnotsalis. Komo tejuatsin tionijkuiliujtok itech nejin nemachtil, uelis tikontekitiltis amaixmej tein moajsij itech Kali kampa tiMosentiliaj uan tionmomachtis tein tikonpanoltis itech nechikol. Akin kiixyekana nejin nemachtil yejua akin kiyekpia, uan akin kiita maj onka amaixmej tein yankuixtok kiskej uan maj yetokan kemej niman uelis se kinajsis. Nejin tokniuj oso akin mitsonmachtia, mitsonnextilis keniuj uelis tikonajsis se taman tein tikonneki. Sayoj xikonelnamiki ke amo uelis tikixtiskej amaixmej tein moajsij itech Kali kampa tiMosentiliaj; uan no, moneki tiktekitiltiskej ika nejmachkayot uan amo uelis tiktsojkuiloskej.

Biblia kijtoua ke uelis tikajsiskej “taixmatilis tein Dios kitemaka”, sayoj ke moneki tiktemoskej kemej yeskia teisa tein eujtok uan kitelpia ipatiuj (Proverbios 2:1-5). Itech amaixmej tein moajsij itech Kali kampa tiMosentiliaj uelis tipeuaskej tiktemoskej nejon.

• ¿Toni nepaleuilmej tein ika uelis timomachtiskej moajsij itech Kali kampa tiMosentiliaj?

• ¿Akoni uelis mitsonpaleuis kuali xikontekitilti nejon amaixmej?