Maidakarira kupsakisisa ciri cese kuti muengejere zivo yenyu yo Bhaibheri here? Muno cido co kuda kuzivisisa ngo pamusoro po vhesi imwe kana mundhu, ndau kana ciro cakanangwa mu Bhaibheri here? Kana imwimwi munoda kuziva kuti Izwi ra Mwari ringamubeseresa kudini mucineso camunaco? Perapo mungavona bhibhirioteka ro pa Nyumba yo Umambo.

Rinopa mathurusi anotibesera kupsakisisa. Kangaije imwimwi amuna mabhuku ese akacijikira mu Bhaibheri o Zvapupu zva Jehovha anowanika mu ndumi yenyu. Asi, bhibhirioteka ro pa Nyumba yo Umambo rino mabhuku mazinji abudiswa zvino. Irona ringavazve no sandujo jakasiana-siana jo maBhaibheri, dura mazwi raushoni zve no ma bhuku anobva masoko anobesera maningi. Makasujunuka kuti mushandise bhibhirioteka musongano jicito ja tanga kana japera. Kudari pa ungano pano komputadhori, ingava no Biblioteca da Torre de Vigia. Ici cirongwa co komputadhori cino mabhuku edu akawanda maningi akabatanijwa acikanesi kushandisa mu kupsakisisa, okuti mungasota shwiro, gama kana vhesi.

Irona rinoshandiswa ngo vajiji vo Musongano Upenyu no Mushando. Mungava anokwanisa kushandisa ushoni bhibhirioteka ro pa Nyumba yo Umambo pamunonga mecinasirira Kugajwa kwenyu. Muvonereri wo Musongano Upenyu no Mushando ndiena muvonereri wo bhibhirioteka. Iyena ano mutoro wo kuva no gwinyiso ro kuti mabhuku akabudiswa zvino arimo zve akarongejwa ushoni. Iyena kana mujijisi wenyu wo Bhaibheri angamukhombija njira jamungawana ndijona masoko mazinji amunoda. Asi, apana no bhuku rimwe rinodikana kubudiswa kunja ko Nyumba yo Umambo. Kana zvakadaro, itusu tinodikana kutaja ushoni mabhuku zve atidikani kumatara-tara.

Bhaibheri rinosanangura kudari: kuti tikwanise “kumuzivaMwari”, tinodikana kuita simba ro kupsakisisa zivoyo “inga mare.” (Mazwi Akangwara 2:1-5) Bhibhirioteka ro pa Nyumba yo Umambo ringamubeseranyi kuti mutange kupsakisisa kwenyu.

• Ngo api mathurusi anowanika mu bhibhirioteka ro pa Nyumba yo Umambo?

• Ndiani angamubesera kuti mukwanise kushandisa ushoni bhibhirioteka?