¿Tiknekiskiá xikmati ma̱j de yej kijtowa Itajto̱l Dios? ¿Tiknekiskiá xikmati ma̱j de se̱ versículo o de se̱ personaje, se̱ a̱ltepe̱ʼ o de te̱ tejté̱ yej kijtowa la Biblia? ¿Timotajtani si Itajto̱l Dios wel mitspale̱wiá pan yo̱lmiktilis yej tikpiá? Siga timotajtani iní̱n, xikte̱mo a̱matajkuilo̱lmej pan biblioteca yej onoʼ pan Kajli kan Timonechkowaj.

Iní̱n biblioteca kipiá miak a̱matajkuilo̱lmej kan wel timomachtiáj. Anka téj atikpiá nochi a̱matajkuilo̱lmej yej kiki̱xtiáj yej Tajto̱lmoya̱waj de Jehová pan motajto̱l. Pero pan biblioteca yej onoʼ kan timonechkowaj welij tikasis casi nochi a̱matajkuilo̱lmej yej ki̱sa-oʼ. Anka wel no̱ tikasis seuʼ versión de la Biblia, se̱ diccionario wan miak a̱matajkuilo̱lmej kan wel timomachtiá. Welij ompa timomachtiá achto iga matsi̱nti tanechko̱lis o kua̱ matami. Siga onoʼ se̱ computadora, anka kipiá Watchtower Library, nigaj wel tikasis komati de to-a̱matajkuilo̱lmej wan welij imani̱n tikte̱mowa yej tikmatisneki, o wel tikijkuilowa sekin tajto̱lmej o versículos.

Kipale̱wiáj yej panowaj pan tanechko̱lis Matinemikan wan Matitekipano̱kan iga Jehová. Siga téj tipanowa pan iní̱n tanechko̱lis, welij timomachtiá pan iní̱n biblioteca kua̱ tikpiá asignación. Tayaka̱na de tanechko̱lis Matinemikan wan Matitekipano̱kan iga Jehová, kita iga nochi maono ye̱kti pan iní̱n biblioteca, kita iga maono yej yankuiʼ a̱matajkuilo̱lmej wan kiyejye̱ʼtaliá. Iní̱n tayaka̱na o yej mitsmachtiá wel mitspale̱wiá iga xikasi tamachtilis yej tikte̱mowa. Xikejla̱miki iní̱n, awelij tiki̱xtiá libros pan Kajli kan Timonechkowaj, moneki xikye̱ʼnenti wan amo xikijkuilo.

Pan Biblia kijtowa iga matikasikan «tai̱xmatilis de Dios», moneki matikte̱mokan ken «tesoros yej iyanto» (Proverbios 2:1-5). Pan biblioteca yej onoʼ pan Kajli kan Timonechkowaj welij tiktsi̱ntiáj iga matimoye̱ʼmachti̱kan.

• ¿Te̱ a̱matajkuilo̱lmej tikasis pan biblioteca yej onoʼ pan Kajli kan Timonechkowaj?

• ¿A̱ʼ yéj welij mitspale̱wiá iga xikte̱mo pan iní̱n biblioteca tamachtilis yej tikneki?