Ko mungakonde kufufuza zinthu ziyakine kuti muyangizhyile ciziŵiso canu ca m’Baibolo? Kansi mufuna kuziŵa lembo iyakine, munthu, malo, olo zinthu ziyakine zotomolewa m’Baibolo? Olo payakine mufuna kuziŵa keno Malizu a Mulungu yangakuyavyeni pa vuto iyakine yamuli nayo? Keno n’tetyo, lutani ku laibulale ya pa Ng’anda ya Ufumu.

Kupezeka zinthu zoyavya pofufuza. Payakine mweo muliye mabuku onse ofotokoza Baibolo olembewa na Mboni za Yehova m’cilaŵilo canu. Koma laibulale ya pa Ng’anda ya Ufumu ili na mabuku anyinji alomba. Ingankhale soti na ma Baibolo osiyana-siyana, dikishonale iweme na malifalensi ayakine oyavya pofufuza. Mungaseŵenzeshe laibulale yamene iyi misonkhano ikaliyoyamba olo pavuli pa misonkhano. Keno pali kompyuta, payakine ili na Watchtower Library. Yamene iyi ni pulogilamu ya pakompyuta yamene ili na mabuku anyinji koma soti ni yosavuta pofufuza nkhani, lizu olo lembo.

Ni yoyavya kuli ŵala ali m’Sukulu ya Utumiki. Keno mwelembesha m’sukulu, mungaseŵenzeshe laibulale ya pa Ng’anda ya Ufumu pokonzekela nkhani. Woyanganila sukulu niye ali na udindo woyanganila laibulale. Ooneshesha kuti mabuku alomba alimo nipo aikiwa mwadongosolo. Yove olo okuphunzisani Baibolo angakuonesheni mwamungapezele nkhani yamufuna. Koma mabuku a mu laibulale owamila lini kufuma mu Ng’anda ya Ufumu. Nipo tuwamila kuŵasamalila luweme koma soti tuwamila lini kulembamo.

Baibolo yulaŵila kuti, kuti ‘timuziŵe cendi Mulungu,’ tuwamila kusakila-sakila nzelu “n’nga cuma cofisika.” (Miyambo 2:1-5) Laibulale ya pa Ng’anda ya Ufumu ingakuyavyeni kucita zamene izi.

• Kansi ni zinthu zofufuzila zotyani zamene zupezeka mu laibulale ya pa Ng’anda ya Ufumu?

• Ko ni ŵani angakuyavyani kuti mukoseŵenzesha luweme laibulale?