Ɛkulo kɛ ɛyɛ neɛnleanu amaa wɔanyia Baebolo ne anu ndelebɛbo dɔɔnwo ɔ? Ɛkulo kɛ ɛnwu ngɛlɛlera anzɛɛ awie, ɛleka anzɛɛ debie mɔɔ nwolɛ edwɛkɛ wɔ Baebolo ne anu la kpalɛ ɔ? Anzɛɛ wɔdwenle nwolɛ kɛ asoo Nyamenle Edwɛkɛ ne bahola aboa wɔ yeamaa wɔali wɔ ngyegyelɛ bie anwo gyima ɔ? Ɛnee kɔ Belemgbunlililɛ Asalo mbulukuzielɛleka ne.

Ɔmaa bɛnyia mbuluku mɔɔ bɛfa bɛyɛ neɛnleanu la. Bie a ɛnlɛ Gyihova Alasevolɛ mbuluku mɔɔ gyi Baebolo ne azo mɔɔ wɔ wɔ aneɛ nu la amuala. Noko mbuluku mɔɔ bɛyɛ ye kenlensa ye la wɔ Belemgbunlililɛ Asalo mbulukuzielɛleka ne. Bie a Baebolo ngakyile, edwɛbohilelɛ buluku kpalɛ nee mbuluku gyɛne mɔɔ boa la wɔ ɛkɛ. Ɛbahola wɔazukoa debie wɔ ɛleka ɛhye kolaa na bɛabɔ debiezukoalɛ bo anzɛɛ mekɛ mɔɔ bɛkpɔne la. Saa kɔmpita wɔ ɛkɛ a, bie a Watchtower Library wɔ zolɛ. Ɛhye le mbuluku dɔɔnwo mɔɔ wɔ kɔmpita zo nee nwolɛ ninyɛne mɔɔ ɔmmaa ɔnyɛ se kɛ ɛbakpondɛ edwɛkɛ, edwɛkɛkpɔkɛ anzɛɛ ngɛlɛlera bie wɔ zo a.

Ɔboa sukoavoma mɔɔ yɛ Yɛ Ɛbɛlabɔlɛ Nee Yɛ Ɛzonlenlɛ Nyianu ne bie la. Ɛbahola wɔahɔ Belemgbunlililɛ Asalo mbulukuzielɛleka ne wɔ mekɛ mɔɔ ɛlɛsiezie wɔ gyimalilɛ ne la. Yɛ Ɛbɛlabɔlɛ Nee Yɛ Ɛzonlenlɛ Nyianu zo neavolɛ ne a nea mbulukuzielɛleka ne azo a. Ɔnea kɛ mbuluku mɔɔ bɛye ye kenlensa ye la bie wɔ ɛkɛ na bɛhyehyɛ ye kɛnlɛma. Ɔdaye anzɛɛ wɔ Baebolo kilehilevolɛ ne bahola ahile wɔ kɛzi ɛbanwu edwɛkɛ mɔɔ ɛhyia nwolɛ la. Noko ɔnle kɛ ɛfa Belemgbunlililɛ Asalo ɛkɛ ne buluku ne bie ɛkɔ ɛleka. Eza yɛkulo kɛ yɛnea mbuluku ne mɔ boɛ na yɛangɛlɛhɛlɛ nu.

Baebolo ne ka kɛ amaa yɛanyia “Nyamenle anwo nrɛlɛbɛ” la, ɔwɔ kɛ yɛfi yɛ ɛhulolɛ nu yɛkpondɛ ye kɛ “anwonyia mɔɔ vea la.” (Mrɛlɛbulɛ 2:1-5) Ɛbahola wɔayɛ wɔ neɛnleanu wɔ Belemgbunlililɛ Asalo mbulukuzielɛleka ne.

• Neɛnleanuyɛlɛ ninyɛne boni mɔ a wɔ Belemgbunlililɛ Asalo mbulukuzielɛleka ne a?

• Nwane a bahola aboa wɔ yeamaa wɔayɛ neɛnleanu wɔ ɛkɛ a?