Vetsht du research du fa di Bivvel bessah fashtay? Vitt du may vissa veyyich en sirten verse, adda en person, en blatz, adda ebbes in patiklah es gmenshind is in di Bivvel? Adda, vetsht du vissa eb di Bivvel dich helfa kann mitt ebbes es du am deela bisht mitt? Du kansht di library yoosa an da Fasamling Blatz fa ensahs finna.

Es hott research tools es em helfa kann. Du hosht andem nett awl di publications funn Jehova Sei Witnesses es available sinn in dei language. Avvah di library an da Fasamling Blatz hott’s mensht funn di letshti publications. Es hott aw fleicht diffandi trenslayshins funn di Bivvel, en goodi dictionary, un anri sacha es ma yoosa kann fa research du. Du kansht di library yoosa eb adda noch di fasamling. Vann en computer datt is, hott’s andem di Watchtower Library druff. Dess is en program es en latt funn unsah publications druff hott. Dess macht’s eesiyah fa ebbes uf gukka bei subject, en verse funn di Bivvel, adda even yusht ay vatt.

Es kann selli helfa es parts henn in di Ministry un Layva Fasamling. Du kansht di library yoosa fa dei part reddi greeya. Da Ministry un Layva Fasamling overseer gebt acht uf di library. Eah macht shuah es di letshti publications datt sinn, un es es goot organized is. Vann du ebbes uf gukka vitt, kann eah adda ebbah shunsht dich veisa vi fa’s uf gukka. Avvah, ma dauf kens funn dee bichah aus da Fasamling Blatz nemma. Ma vella goot acht gevva uf dee bichah un nett nei shreiva.

Di Bivvel sawkt vann miah veisheit “funn Gott finna” vella, missa miah willing sei fa gukka difoah, so vi sucha “fa keshtlichi” sacha es fashtekkeld sinn. (Shpricha 2:1-5) Di library an da Fasamling Blatz kann dich helfa kshteaht vadda.

• Vass fa research tools sinn available in di library an da Fasamling Blatz?

• Veah kann dich helfa lanna vi fa di library yoosa?