¿Munawaqchu Bibliapa yachachisqankunamanta astawan yachayta? ¿Munawaqchu mayqen textonmanta astawan yachayta, Bibliapa willasqan mayqen runamanta, may law sitiomanta chaynataq imapas pasasqanmanta? ¿Haykapipas tapukurqankichu Diospa Palabranpa yanapayninwan sasachakuynikita imayna allichanaykimanta? Chayna kaptinqa kallpanchaykikum Salonpi waqaychasqa qellqakunata servichikunaykipaq.

Kachkanmi tukuymanta yachanapaq qellqakuna. Jehová Diospa testigonkunapa rurasqanku qellqakunaqa manapaschá llapanchu kapusunki, Salonpim ichaqa yaqa llapan qellqakuna kachkan. Kachkanpaschá huk Bibliakuna, diccionario chaynataq sapaq qellqakunapas. Servichikuwaqmi huñunakuy manaraq qallariyta otaq tukuytapas. Computadora kaptinqa ichapas kachkan Watchtower Library nisqa, chaypim tarinki mana sasachakuspalla yachay munasqayki yachachikuykunata, palabrakunata otaq textokunatapas.

Diospa Munayninta Ruwananchikpaq huñunakuypi yachachiqkunapas servichikunmankum. Salonpi qellqakunataqa servichikuwaqmi huñunakuypi ima tupasusqaykitapas preparakunaykipaq. Chay qellqakunamanta cuentallikuqqa Diospa Munayninta Ruwananchikpaq huñunakuymanta cuentallikuq iñiqmasinchikmi, paymi segurakun chayllaraq chaskisqanchik qellqakuna kananpaq chaynataq orden ninpi kananpaqpas. Paypas otaq estudiachisuqnikipas yachachisunkimanmi imapas yachay munasqaykita imaynata tarinaykipaq. Ichaqa manam chay qellqakunataqa apakuwaqchu, sumaqllatam servichikunayki, manataqmi imawanpas señalanaykichu.

‘Diospa yachayninta’ tarinapaqqa ‘pakata hina maskanapaqmi’ kallpanchakuna (Proverbios 2:1-5). Chaypaqmi anchata yanapawanchik Huñunakunapaq Salonpi waqaychasqa qellqakunaqa.

• ¿Ima qellqakunam waqaychasqa kachkan Salonpi?

• ¿Pitaq yanapasunkiman Salonpi kaq qellqakunawan yachanaykipaq?