Kamľanas feder te rozuminel varesave biblicke veršoske abo te džanel buter pal varesavo than abo manuš, pal savo genen andre Biblija? Phenen tumenge, sar šaj tumenge pomožinel e Biblija aleha, so akana predživen? Ča aven andre zborovo kňižňica a arakhena, so tumenge kampela.

Kňižki, časopisi the aver biblicko literatura, so pomožinen feder te achaľol la Biblijake. Asi tumen nane savore kňižki the o časopisi, so dine avri le Jehovaskere svedki andre tumari čhib. Ale andre zborovo kňižňica šaj arakhen ajse publikaciji. Možno the všelijaka Bibliji, lačhe slovňiki the aver goďaver kňižki, so višvetľinen la Biblija. Šaj ode džan anglo abo pal o zhromažďeňe. Te hin andre zborovo kňižňica o počitačis, určiťe ode hino o počitačovo programos Watchtower library, andre savo hin amare savore biblicka kňižki the o časopisi. Ada programos pomožinel sigeder te arakhel a te dodžanel pes buter pal varesavo biblicko lav, veršos abo tema.

Hiňi lačhi prekal ola, so len hin ulohi pro zhromažďeňe o Dživipen the služba. Šaj džan andre zborovo kňižňica te pripravinel peske ode peskeri uloha. O phral, so dodikhel pro zhromažďeňe O kresťansko dživipen the služba, pes starinel pal adi kňižňica, kaj ode te en nekneveder kňižki, časopisi the aver biblicko literatura a thiš dodikhel pre ada, kaj savoro te el pre peskero than. Ov abo oda, so tumen sikavel andal e Biblija, tumenge šaj phenel, sar te arakhel, so tumenge kampel. Andal e zborovo kňižňica pes na len o kňižki khere, das pozoris pre lende a na pisinas andre.

Andre Biblija pes phenel, hoj mušinas te rodel le Devleskeri goďi avka, sar rodas garudo barvaľipen, poklados. (Príslovia 2:1-5) E zborovo kňižňica šaj tumenge aleha igen pomožinel.

• Save kňižki, časopisi the aver biblicko literatura šaj arakhen andre zborovo kňižňica?

• Ko tumenge šaj phenel, sar te rodel andre adi kňižňica?