Qullaawu Maxaafi egenno lexxate babbaxxitino borro xiinxalla hasiˈratto? Seekkite huwata hasiˈratto qummeeshshi, woy Qullaawu Maxaafi giddo seekkite afa hasiˈratto manchi, woy bayichi woy woluri no? Woy atera baxxe hibbo ikkinohe coyira Maganu Qaalinni kaaˈlo afiˈra hasiˈratto? Hatto ikkiro, Gambooshshu Addaraashera nooha maxaaffate mine horoonsiˈri.

Maxaaffate mine xiinxallote kaaˈlannori lowori no. Miteekkite Yihowa Farciˈraasine ati coyiˈratto afiinni qixxeessitinote Qullaawu Maxaafi aana xintantino borro giddo gama hooggahera dandiitanno. Gambooshshu Addaraashera maxaaffate mine kayinni muli yannara fultino borro giddo rooriidita afiˈratto. Qoleno addi additi Qullaawu Maxaafi tiro, dancha dikishineere, hattono wole xiinxallote kaaˈlitanno maxaaffa heedhara dandiitanno. Songote gambooshshi hanafara albaannino ikko goofi gedensaanni maxaaffate mine horoonsiˈra dandaatto. Maxaaffate mini kompiyutere nooha ikkiro, Wochitawori Layibirerii yinanni pirogiraame nooha ikkara dandaanno. Tini kompiyuterete pirogiraame batinye borronna mittoreno qarrammikki mitto coye hasiˈne afiˈrate kaaˈlannore amaddino; tenne pirogiraame aana mitto birxicho, mitto qaale, woy qummeeshsha hasidhe afiˈra dandaatto.

Maxaaffate mini Kiristaanu Heeshshonna Soqqansho Gambooshshi rosaanora lowonta kaaˈlanno. Kifilla qixxaawatto woyite Gambooshshu Addaraashera maxaaffate mine noo borro horoonsiˈra dandaatto. Maxaaffate mine qineessannohu Kiristaanu Heeshshonna Soqqansho Gambooshshi aliidi laˈˈaanchooti. Kuni rodii yanna yannante fultanno borro maxaaffate mine worroonnironna garunni biddi yitinoro laˈˈanno. Isi woy Qullaawa Maxaafa xiinxallisannohehu afa hasiˈrootto coye hiittoonni afiˈrattoro leellishahera dandaanno. Ikkollana, maxaaffate miniha mitto maxaafano Gambooshshu Addaraashenni adhe haˈra dihasiissanno. Qoleno maxaaffa danchu garinni amada hasiissanno, hattono maxaaffate giddo mittoreno biiretenni woy wolurinni malaatisa dihasiissanno.

Qullaawu Maxaafi “Magano seekke afate” “maaxantino jiro gede” assine egenno hasiˈra hasiissannonketa coyiˈranno. (Lawishsha 2:1-5) Gambooshshu Addaraashera noohu maxaaffate mini egenno hasiˈrate lowo geeshsha kaaˈlannohe.

• Gambooshshu Addaraashera maxaaffate mine xiinxallote kaaˈlannori mayi mayi no?

• Maxaaffate mine seekkite horoonsiˈratto gede kaaˈlitahera dandiitannori ayeooti?