Yu wani ondrosuku sani so taki yu kan kon sabi moro fu Bijbel? Yu wani sabi moro fu wan tekst, wan sma, wan presi, noso wan tra sani di kari na ini Bijbel? Noso yu aksi yusrefi efu Gado Wortu kan yepi yu nanga wan problema di yu abi? We, dan yu kan gebroiki den buku na ini a bukukasi fu a Kownukondre zaal.

Yu kan feni yepisani drape fu ondrosuku tori moro fini. A kan taki yu no abi ala den Bijbel publikâsi fu Yehovah Kotoigi na ini yu tongo. Ma den moro nyun buku de na ini a bukukasi fu a Kownukondre zaal. A kan abi difrenti Bijbel vertaling, wan bun wortubuku, nanga tra buku fu ondrosuku sani. Fosi a konmakandra bigin èn baka a konmakandra, yu kan gebroiki den sani di de na ini a bukukasi. Efu wan computer de drape, dan a kan taki a Watchtower Library de na tapu. Disi na wan computer programa di abi furu fu den buku fu wi na tapu. Boiti dati, a makriki fu suku wan tori, wan wortu, noso wan Bijbeltekst nanga a programa dati.

Den studenti fu a Wi Kresten libi nanga a preikiwroko kan gebroiki en. Yu kan gebroiki den buku na ini a bukukasi fu a Kownukondre zaal te yu e sreka yusrefi gi wan lezing. Na opziener fu a Kresten libi nanga a preikiwroko konmakandra abi a frantwortu fu a bukukasi. Na en abi a frantwortu fu sorgu taki den moro nyun buku de drape èn taki den buku seti bun. En noso a sma di e studeri Bijbel nanga yu kan sori yu fa yu kan feni san yu e suku. Ma nowan sma mag teki den buku na ini a bukukasi tyari gowe. Den musu tan na ini a Kownukondre zaal. A no de fu taki dati wi wani sorgu bun gi den buku èn wi no o skrifi na ini den.

Bijbel e sori taki wi musu „kon leri sabi Gado”. Efu wi wani du dati, dan wi musu du muiti neleki fa „sma e suku gudu di kibri” (Odo 2:1-5). Yu kan bigin suku den sani di yu wani sabi na ini den buku fu a bukukasi na ini a Kownukondre zaal.

• Sortu yepisani wi kan feni fu ondrosuku tori moro fini na ini a Kownukondre zaal?

• Suma kan yepi yu fu gebroiki den buku na ini a bukukasi?