E fia fai ni au hukehukega ke atiake tō poto faka-Tuhi Paia? Pe e fia iloa e koe he mau patino e uiga ki he tino, he nofoaga, pe ko he mea e taku mai i te Tuhi Paia? Pe kua mafaufau koe vēia e mafai oi fehoahoani mai te Kupu a te Atua ki hō popolega totino? Ke fakaaogā e koe te potu tuhi i te Fale o Hauniga.

E fōki mai ni meafaigaluega e fehoahoani ki te fai o ni hukehukega. Hōvē, e hē i a te koe nā lōmiga faka-Tuhi Paia a Molimau a Ieova e maua i tau gagana. Kae e i ei i te potu tuhi i te Fale o Hauniga te lahiga o nā lōmiga fou. Hōvē e i ei ni fakaliliuga kehekehe o te Tuhi Paia, he tuhi lomifefiloi lelei, ma iē tahi lōmiga fakamatala e fehoahoani atu. E fakataga tō fakaaogā o te potu tuhi i te kamataga ma te fakaikuga o nā hauniga. Kāfai e i ei he komepiuta, hōvē kua i ei te polokalame o te Watchtower Library. Ko he polokalame komepiuta e i ei he fakaputuputuga lahi o a matou lōmiga ma he vaega e hakiligofie, e mafai oi kē hukehuke he matakupu, he kupu, pe ko he mau.

E aogā mo nā tino ākoga i te Ākoga mo nā Tino Talaki. Kāfai kua tuhia tō igoa i te ākoga, hōvē ia e mafai oi fakaaogā lelei e koe te potu tuhi i te Fale o Hauniga i te taimi e hauni ai ni au lauga. E taukikila e te tino tauhi o te ākoga te potu tuhi. E i a te ia te tiute taukave ke fakamautinoa e i ei nā lōmiga fou ma teu fakalelei. Ko ia pe ko tē e akoako koe i te Tuhi Paia e mafai oi fakahino atu te auala e mafai oi maua ai nā fakamatalaga e fofou koe ki ei. Kae, e hē mafai oi kavekehe he tuhi mai te Fale o Hauniga. Ko te mea moni foki, e taumafai oi fakaaogā fakalelei nā tuhi ma nahe māka he tuhi.

E fakamatala mai e te Tuhi Paia ke “maua ai te poto i te Atua,” e tatau ke ki tatou lotomalilie oi hakili ki ei “e vē ona hukehuke ki te koloa lilo.” (Fataoto 2:​1-5) Ko te potu tuhi i te Fale o Hauniga e mafai oi fehoahoani atu ke kamata ai tau hakilikiliga.

• He ā nā mea faigaluega mo hukehukega e maua i te potu tuhi i te Fale o Hauniga?

• Ko ai e mafai oi fehoahoani atu ki a te koe ke lelei tō fakaaogā o te potu tuhi?