Te ke sai‘ia ke fai ha fekumi ke fakalahi ho‘o ‘ilo fekau‘aki mo e Tohi Tapú? ‘Okú ke fie‘ilo fekau‘aki mo ha konga Tohi Tapu pe ko ha tokotaha pau, feitu‘u, pe ko ha me‘a ‘oku lave ki ai ‘a e Tohi Tapú? Pe kuó ke fifili pe ‘e lava ke tokoni‘i koe ‘e he Folofola ‘a e ‘Otuá ‘i ha hoha‘a fakafo‘ituitui ‘okú ke ma‘u? Pe‘i ‘a‘ahi leva ki he laipeli ‘a e Fale Fakataha‘angá.

‘Oku ‘omai ai ‘a e ngaahi me‘angāue fakaefekumi ‘aonga. Ngalingali ‘oku ‘ikai te ke ma‘u ‘a e ‘ū tohi kotoa makatu‘unga ‘i he Tohi Tapú ‘a e Kau Fakamo‘oni ‘a Sihová ‘a ē ‘oku ala ma‘u ‘i ho‘o leá. Ka ko e laipeli ‘a e Fale Fakataha‘angá ‘oku ‘i ai ‘a e lahi taha ‘o e ‘ū tohi ki muí ni maí. ‘Oku toe ‘i ai nai ha ngaahi liliu Tohi Tapu kehekehe, ko ha tikisinale lelei, mo ha ngaahi tohi ma‘u‘anga fakamatala ‘aonga kehe. ‘Oku ‘atā ke ke ngāue‘aki ‘a e laipelí ki mu‘a pea mo e hili ‘a e ngaahi fakatahá. Kapau ‘oku fokotu‘u ai ha komipiuta, ‘e ‘i ai nai ‘a e Watchtower Library. Ko ha polokalama faka‘ilekitulōnika eni ‘a ia ‘oku ‘i ai ha tānekina lahi ‘o ‘emau ‘ū tohí mo ha tafa‘aki fakaefekumi faingofua ke ngāue‘aki ‘a ia ‘e lava ke ke kumi ai ki ha kaveinga, ko ha fo‘i lea, pe ko ha konga Tohi Tapu.

‘Oku ‘aonga ia ki he kau ako ‘i he Fakataha ki he Moʻuí mo e Ngāue Fakafaifekaú. ‘Oku malava ke ke ngāuelelei‘aki ‘a e laipeli ‘a e Fale Fakataha‘angá ‘i ho‘o teuteu‘i ho‘o ngaahi lēsoní. ʻOku tokangaʻi ʻe he ʻovasia ʻo e Fakataha ki he Moʻuí mo e Ngāue Fakafaifekaú ʻa e laipelí. ‘Oku fakafatongia ia ke ne fakapapau‘i ‘oku ‘i ai ‘a e ‘ū tohi fakamuimui tahá pea ‘oku fokotu‘utu‘u lelei. Ko ia pe ko ho‘o faiako Tohi Tapú ‘e lava ke na fakahā atu kiate koe ‘a e founga ke ma‘u ai ‘a e fakamatala ‘okú ke fiema‘ú. Kae kehe, ‘oku ‘ikai totonu ke ‘ave ha ‘ū tohi mei he laipeli ‘a e Fale Fakataha‘angá. Pea ko e mo‘oni, ‘oku mau loto ke tokanga‘i lelei ‘a e ‘ū tohí pea ke ‘oua ‘e tohitohi‘i ia.

‘Oku fakamatala‘i ‘e he Tohi Tapú ke ‘ma‘u ‘a e ‘ilo‘i ‘o e ‘Otuá,’ kuo pau ke tau loto-lelei ke kumi ki ai ‘o hangē “ha ha‘ao ki ha koloa fufuú.” (Palōveepi 2:1-5) Ko e laipeli ‘a e Fale Fakataha‘angá ‘e lava ke tokoni ia kiate koe ke kamata ho‘o fekumí.

• Ko e hā ‘a e ngaahi me‘angāue fakaefekumi ‘oku ala ma‘u he laipeli ‘a e Fale Fakataha‘angá?

• Ko hai ‘e lava ke ne tokoni‘i koe ke ke ngāue‘aki lelei taha ‘a e laipelí?