Xana u nga swi tsakela ku endla ndzavisiso wo karhi leswaku u engetela vutivi bya wena hi Bibele? Xana u tsakela ku tiva hi tsalwa ro karhi kumbe munhu wo karhi, ndhawu yo karhi kumbe swin’wana leswi boxiweke eBibeleni? Kumbe u tshame u tivutisa loko Rito ra Xikwembu ri nga ku pfuna hi mhaka yo karhi leyi ku karhataka? Kutani u nga tirhisa layiburari ya le Holweni ya Mfumo.

Yi ni switirhisiwa leswi pfunaka swo endla ndzavisiso ha swona. Swi nga endleka leswaku a wu na minkandziyiso hinkwayo ya Timbhoni ta Yehovha leyi sekeriweke eBibeleni leyi kumekaka hi ririmi ra wena. Kambe layiburari leyi nga eHolweni ya Mfumo yi ni minkandziyiso yo tala ya sweswinyana. Nakambe swi nga ha endleka yi ri ni vuhundzuluxeri byo hambana-hambana bya Bibele, xihlamusela-marito lexinene ni switirhisiwa swin’wana leswi pfunaka ku endla ndzavisiso. U nga tirhisa layiburari ya n’wina loko minhlangano yi nga si sungula niloko yi herile. Loko ku ri ni khompyuta, yi nga ha va yi ri ni Watchtower Library. Watchtower Library leyi nga eka khompyuta yi ni minkandziyiso ya hina yo tala naswona yi ni nchumu lowu swi olovaka ku wu tirhisa wo lavisisa ha wona lowu u nga lavisisaka nhloko-mhaka, rito kumbe ndzimana yo karhi.

Yi pfuna swichudeni eka Minhlangano Ya Mahanyelo Ni Ntirho Wa Hina Wo Chumayela. U nga swi kota ku yi tirhisa kahle layiburari ya le Holweni ya Mfumo loko u lunghiselela tinkulumo ta wena. Mulanguteri wa Mahanyelo Ni Ntirho Wo Chumayela hi yena a langutelaka layiburari. U ni vutihlamuleri bya ku tiyiseka leswaku minkandziyiso ya sweswinyana yi kona ni leswaku yi hlelekile. Yena kumbe munhu loyi a dyondzaka na wena Bibele a nga ku komba ndlela leyi u nga ri kumaka ha yona rungula leri u ri lavaka. Hambiswiritano, tibuku leti nga le layiburari a ti fanelanga ti tekiwa eHolweni ya Mfumo. Hi fanele hi tikhoma kahle tibuku toleto naswona hi nga ti tsala-tsali.

Bibele yi vula leswaku loko hi ta kuma “vutivi bya Xikwembu,” hi fanele hi tiyimisela ku byi lavisisa “kukota xuma lexi fihliweke.” (Swivuriso 2:1-5) Layiburari ya le Holweni ya Mfumo yi nga ku pfuna ku endla ndzavisiso wolowo.

• Hi swihi switirhisiwa swo endla ndzavisiso ha swona leswi nga kona elayiburari ya le Holweni ya Mfumo?

• I mani la nga ku pfunaka leswaku u yi tirhisa kahle layiburari?