Потэ-а тӥляд кыӵе ке темаез эскеремды, Библиез умойгес валан понна? Оло, тӥледыз Библиысь кыӵе ке кылбур тунсыкъяськытэ? Яке тӥляд тросгес тодэмды потэ Библиысь кыӵе ке адями, кар яке арбери сярысь? Оло нош, тӥледлы Библиысь визь-кенеш кулэ, шуг-секыттэс вормон понна? Соку пыралэ Эксэйлык юртысь библиотекае.

Со — эскеронын кулэ луись юрттэт. Тӥляд вордскем кылыныды Иеговалэн Адӟись-Ивортӥсьёсызлэн вань публикациоссы ӧвӧл, дыр. Но соос Эксэйлык юртысь библиотекаын вань, вылды. Библиотекае ялан выль публикациосты ваё. Милесьтым публикациосмес сяна, отысь луоз шедьтыны Библилэсь пӧртэм берыктэмъёссэ, кыллюкамъёсты но энциклопедиосты. Библиотека ваньмыз понна усьтэмын кенешлэн пумиськонъёсыз азьын но, соос йылпумъяськем бере но. Отын компьютер вань ке, отчы Возьмаськон башнялэн электронной библиотекаез (Watchtower Library) пуктэмын луыны кулэ. Со компьютерной программае туж трос пӧртэм публикациосмы пыртэмын. Огшоры утчан система юрттэ шедьтыны котькыӵе публикациысь кулэ луись темаез, кылэз яке Библиысь кылбурез.

Со — дунъяны луонтэм юрттэт соослы, кинъёс Инмарлы ужан-тыршон школаын дышетско. Со Школаын тӥледлы уж сётӥзы ке, дасяськыны юрттоз Эксэйлык юртысь библиотека. Со понна кыл кутэ Школаез ортчытӥсь. Со чакла, отчы выль публикациос ватсамын мед луозы но соослэн вылтуссы умой мед луоз шуыса. Школаез ортчытӥсь яке со, кин тӥледлы Библиез дышетыны юрттэ, возьматыны быгатоз, кызьы тӥледлы кулэ луись ивортодэт шедьтоно. Кулэ ӧвӧл библиотекаысь книгаосты Эксэйлык юртысь поттыны яке гожъяськыны соос вылын. Книгаосты жаляно.

Кызьы верамын Библиын, «Инмар сярысь тодонэз» шедьтон понна, «дуно ваньбурез кадь сое шедьтыны» тыршоно (Мадёнъёс 2:1—5). Эксэйлык юртысь библиотека юрттоз тӥледлы со тодон-валанъёсты утчаны кутскыны.

• Мае шедьтыны луоз Эксэйлык юртлэн библиотекаысьтыз?

• Кин тӥледлы возьматыны быгатоз, кызьы библиотекаысь кулэ луись ивортодэт шедьтоно?