Karuyag mo ba magsaliksik basi madugangan an imo kahibaro ha Biblia? May pakiana ka ba mahitungod hin usa nga teksto, tawo, lugar, o butang nga gin-unabi ha Biblia? O may problema ka ba ngan ginhuhunahuna mo nga mabubuligan ka han Pulong han Dios? Sigurado nga makakabulig ha imo an librarya han Kingdom Hall.

Nagtatagana hin bulig ha pagsaliksik. Bangin diri ka kompleto han basado-ha-Biblia nga publikasyon han mga Saksi ni Jehova ha imo yinaknan. Kondi an librarya han Kingdom Hall may-ada han kadam-an han bag-o nga publikasyon. Bangin may-ada liwat ito iba-iba nga bersyon han Biblia, diksyonaryo, ngan iba pa nga mapulsanon nga reperensya. Puydi mo gamiton ito antes ngan katapos han katirok. Kon may kompyuter didto, posible nga may-ada ito Watchtower Library—usa nga program ha kompyuter nga nagsusulod hin daku nga koleksyon han amon publikasyon. May-ada liwat ito masayon-gamiton nga search feature nga makakabulig ha pagbiling hin reperensya may kalabotan ha usa nga topiko, pulong, o teksto.

Mapulsanon para ha mga estudyante han Teokratiko nga Eskwelahan ha Ministeryo. Kon estudyante ka ha Teokratiko nga Eskwelahan, mahimo ka magpahimulos hini nga librarya ha pag-andam hin bahin. An paramangno han eskwelahan an nanginginano hini. Responsabilidad niya an pagsiguro nga organisado ini ngan kompleto han bag-o nga publikasyon. Mabubuligan ka niya, o han nagdudumara hin pag-aram ha Biblia ha imo, kon paonan-o bibilngon an impormasyon nga imo ginkikinahanglan. Kondi waray publikasyon nga igagawas ha Kingdom Hall. Syempre, karuyag naton hirotan an mga publikasyon ngan diri magmarka dida hito.

An Biblia nasiring nga basi ‘hiagian an kahibaro han Dios,’ kinahanglan andam kita nga bilngon ito ‘sugad hin tinago nga bahandi.’ (Proberbios 2:1-5) Mabubuligan ka han librarya han Kingdom Hall ha pagbiling hito.

• Ano nga mga bulig ha pagsaliksik an aadto ha librarya han Kingdom Hall?

• Hin-o an makakabulig ha imo ha paggamit han librarya han Kingdom Hall?