Asa mba tianao izikoa anao mahavita mizaha boky na CD ahaizanao raha koran̈iny Baiboly? Anao koa fa mamaky Baiboly, mety misy an̈aran̈a tany na tanàna na olo tianao hay tsarabe. Mety misy raha manahiran̈a anao koa tianao azahoan̈a fan̈azavan̈a. Misy boky maro efa nakajin̈y amy Tran̈o Fivorian̈a an̈y ahitanao fan̈azavan̈a mikasiky raha jiaby zen̈y.

Izio ahavitanao mitady fan̈azavan̈a maro. Anao mety tsy manan̈a boky jiaby naboakany Vavolombelon̈o Jehovah. Amy Tran̈o Fivorian̈a an̈y ahitanao boky mbala tsy ela fo nisiany ndreky Baiboly karazany maro. An̈y koa misy diksionera ndreky boky hafa mety ahitanao fan̈azavan̈a. Anao mety mizaha iro io alohany fivorian̈a na vita fivorian̈a. Amy Tran̈o Fivorian̈a sasany misy ordinatera, efa misy Watchtower Library koa ao. Izio CD araiky efa misy boky maro an̈aty ao. Anao koa hizaha fan̈azavan̈a ao, anao mety manoratra volan̈a araiky na toko ndreky andininy araiky amy Baiboly.

Izio man̈ampy pianatra hanan̈o anjara amy Fivorian̈a Momba Fiain̈anantsika Ndreky Fanompoan̈a. Anao mety mampiasa biblioteky amy Tran̈o Fivorian̈a an̈y izikoa fa man̈oman̈a anjaranao. Piandraikitry Fivorian̈a Momba Fiain̈anantsika Ndreky Fanompoan̈a miandraikitry tany fasian̈a boky amy Tran̈o Fivorian̈a ao. Izy koa mampiditry boky vaovao ndreky mandamin̈y boky jiaby ao. Izy na olo mampianatra anao Baiboly mety man̈ambara fizahan̈a boky ao. Boky jiaby ao tsy mahazo tsipihin̈y ndreky indesin̈y mody.

Volan̈iny Baiboly, atsika koa man̈iry hahay Zan̈ahary tsarabe, mila mifen̈y mianatra izio, karaha ataonolo mifen̈y mangady volamena in̈y. (Ohabolana 2:1-5) Zen̈y dikany nikajian̈a boky amy Tran̈o Fivorian̈a ao.

• Ino aby ma raha mety ahitan̈a fan̈azavan̈a amy Tran̈o Fivorian̈a an̈y?

• Azovy aby mety man̈ambara anao fizahan̈a boky mikajy ao?