Ana akusaka kuwungunyawungunya yine pakusaka kuti amanyilile yejinji pakwamba ya Baibulo? Ana akusaka ali alimanyi cenene lilemba line lyakwe kapena kummanyilila cenene mundu jwine jwakwe, malo, kapena cindu cine cakwe cakucikolanga m’Baibulo? Ana pakwete paliwusisye naga Maloŵe ga Mlungu mpaka gakamucisye yakusawusya yawo? Naga yili m’yoyo, komboleka kwawula ku cipinda cakusunjila mabuku ca pa Nyumba ja Ucimwene.

Jikusatukamucisya kupata yida yakamucisya pakuwungunya. Komboleka kuti wawojo nganakola mabuku gosope gakutagulila ya m’Baibulo ga Mboni sya Yehofa gagakusimanikwa mu ciŵeceto cawo. Nambo cipinda cakusunjila mabuku ca pa Nyumba ja Ucimwene jawo cikwete mabuku gejinji gasambano. Kombolekasoni kuti cikwete Mabaibulo gakulekanganalekangana, buku jagopolela maloŵe jambone, soni mabuku gane gakamucisya pakuwungunya. Misongano mkanijitande, soni jili jimasile, komboleka kamulicisya masengo yayili mu cipinda cakusunjila mabuku. Naga akwete kompyuta mu cipinda cawo cakusunjila mabuku, komboleka kuti jikwete pologalamu jakolanjikwa kuti Watchtower Library jajikwete mabuku getu, soni jili jangasawusya kuwungunya ngani, maloŵe, kapena lilemba.

Jili jakamucisya kwa ŵakulijiganya ŵa mu Msongano wa Undumetume ni Umi. Komboleka kamulicisya masengo cipinda cakusunjila mabuku ca pa Nyumba ja Ucimwene jawo pakukosecela ngani jawo. Jwakulolela Msongano wa Undumetume ni Umi ali jwakulolela cipinda cakusunjila mabuku. Jwalakwe akusalolecesya kuti mu cipindaci mwana mabuku gasambano, soni kuti mabuku agaŵisilemo cenene. Jwakulolela msonganowu kapena jwakwajiganya Baibulo komboleka kwalosya kapate ka ngani jakujisaka. Nambope, akasatyosya buku jilijose mu Nyumba ja Ucimwene. Soni patukamulicisya masengo tugasamaleje cenene mabukuga, soni ngalembamo cilicose.

Baibulo jikusaŵeceta kuti, kuti tummanyilile ‘Mlungu yisyesyene,’ tukusosekwa kusacilila kuwungunyawungunya “mpela cipanje cakusisika.” (Miyambo 2:1-5) Cipinda cakusunjila mabuku ca pa Nyumba ja Ucimwene komboleka kwakamucisya kutanda kuwungunya kwawo.

• Ana mu cipinda cakusunjila mabuku ca pa Nyumba ja Ucimwene ca pa Nyumba ja Ucimwene cana yindu yatuli yakuwungunyila?

• Nduni jwampaka ŵakamucisye kamulicisya masengo cenene nyumba jakusunjila mabuku?