Lenda mona khini mu tombatomba muingi wubuela nzayilu aku mu Bibila? Tsatu yidi yaku yi bakula verse mosi yi Bibila, voti tidi zaba mutu mosi, voti buangu kimosi kioki Bibila katubidi? Voti weta kiyuvusa ti Phova Nzambi yilenda kusadisa mu diambu dimosi dilembo tungisa? Ti buawu buididi, yenda tombitombi mu bibloteke yi Nzo yi Kimfumu.

Yidi ayi minkanda ayi bima binkaka mu diambu di tombatomba. Tumbanza wisi ko minkanda mioso mi Zimbangi zi Yehova miomi mieta tubila Bibila miomi mibimini mu mbembo eno. Vayi, mu bibloteke yi Nzo yi Kimfumu, muidi ayi minkanda miwombo mio mimebima. Muawu mulenda ba zimbangudulu zi Bibila, diksionere mosi yi mbote ayi minkanda minkaka mu diambu di tombatomba. Lenda sadila bima bioso bidi mu bibloteke tekila lukutukunu lu ba, voti ku manima ma lukutukunu. Ti ordinatere yidi, yilenda ba ayi programi Watchtower Library. Yawu yidi bibloteki elekroniki yo yidi minkanda mieto miwombo, ayi yo yisi ko phasi mu tombatomba disolo, diambu, voti verse yimosi.

Yeta sadisa bana ba Kalasi yi Kisalu ki Teokrasi. Ti wusonikisa dizina diaku mu kalasi beni, lenda sadila minkanda mi bibloteki yi Nzo yi Kimfumu mu thangu wulembo bongisa malongi maku. Nkengidi yi kalasi beni beki kiyeko ki tadilanga bibloteki beni, ki buela minkanda mioso mimebima, ayi tula minkanda mu ntanda. Niandi voti nioni weta longuka yaku Bibila lenda kumonisa bue lenda muena diambu diodi wuntomba. Vayi kadi bimisa nkanda mu Nzo yi Kimfumu. Ayi, tufueti sadila minkanda beni mu diela, ayi kadi sonika miawu.

Bibila tubidi ti mu “baka nzayilu yi Nzambi,” tufueti tombatomba dede “bima bi mfunu bisuemi.” (Zingana 2:1-5) Bibloteki yi Nzo yi Kimfumu yilenda kusadisa wubaka nzayilu beni.

• Mu Nzo yi Kimfumu, bima mbi bilenda tusadisa mu tombatomba?

• Na nioni lenda kusadisa wuzaba sadila bibloteki mbotembote?