¿A kʼáat wa a kan u maasil tiʼ le Bibliaoʼ? ¿Yaan wa baʼax maas taak a wojéeltik yoʼolal junpʼéel versículo, yoʼolal juntúul máak, junpʼéel kúuchil wa yoʼolal uláakʼ baʼax ku yaʼalik le Bibliaoʼ? ¿Yaan wa kʼiin tsʼoʼok a tuklik wa jeʼel u yáantkech le Biblia a wutskíint junpʼéel talamil yaantechoʼ? Wa beyoʼ, maʼalob ka meyajnaktech le jóoʼsaʼaniloʼob yaan tu bibliotecail le Najil Reinooʼ.

Jach jeʼel u yáantkech le baʼaxoʼob yaan teʼ bibliotecaoʼ. Maʼ xaaneʼ minaʼantech tuláakal le jóoʼsaʼaniloʼob tsʼoʼok u beetik u j-jaajkunajoʼob Jéeoba ichil le idioma a wojloʼ; baʼaleʼ tu bibliotecail u Najil Reinoeʼ yaan óoliʼ tuláakal le jóoʼsaʼaniloʼob maas túumbenoʼoboʼ. Maʼ xaaneʼ yaan xan u jejeláasil bibliaʼobiʼ, junpʼéel jach maʼalob diccionario yéetel uláakʼ libroʼobiʼ. Jeʼel u páajtal u meyajtechoʼob táanil tiʼ u káajal le muchʼtáambal wa le ken tsʼoʼokkoʼ. Wa yaan junpʼéel computadoraeʼ, maʼ xaaneʼ tsʼaʼan le Watchtower Library tiʼoʼ, lelaʼ junpʼéel programa ku yeʼesik le baʼaxoʼob ku yaʼalik le jóoʼsaʼaniloʼoboʼ yéetel séebaʼan jeʼel a kaxtik u kʼaabaʼ junpʼéel xook, junpʼéel tʼaan wa junpʼéel versiculoeʼ.

Jach jeʼel u yáantik le máaxoʼob ku táakpajloʼob teʼ muchʼtáambal Kuxtal yéetel Meyaj jeʼex Cristoeʼ. Wa tsʼaʼantech junpʼéel jaats teʼ muchʼtáambalaʼ, maʼalob ka meyajnaktech le biblioteca yaan tu Najil Reino utiaʼal a líiʼskabaoʼ. Le sukuʼun nuʼuktik le muchʼtáambal Kuxtal yéetel Meyaj jeʼex Cristooʼ, letiʼ ilik ka yanak tu tsoolol le jóoʼsaʼaniloʼob bey xan ka yanak le maas túumbenoʼoboʼ. Le sukuʼunaʼ wa le máax tsʼáaiktech xookoʼ jeʼel u yeʼeskoʼobtech bix jeʼel a kaxtik le xook kʼaʼabéettechoʼ. Baʼaleʼ mix junpʼéel libro yaan teʼ biblioteca unaj u bisaʼaloʼ; unaj k-kanáantkoʼob yéetel maʼ unaj k-marcarkoʼobiʼ.

Le Bibliaoʼ ku yaʼalikeʼ jach unaj u tsʼáaik u yóol máak u kʼaj óolt Dios, lelaʼ bey jeʼex u tsʼáaik u yóol máak u kaxt «junpʼéel ayikʼalil» taʼakaʼaneʼ (Proverbios 2:1-5). Le biblioteca yaan teʼ Najil Reinooʼ jach jeʼel u yáantkoʼon k-kaxt le baʼax kʼaʼabéettoʼonoʼ.

• ¿Baʼaxoʼob yaan tu bibliotecail le Najil Reinooʼ?

• ¿Máax jeʼel u kaʼansiktech bix jeʼel u meyajtech le baʼaxoʼob yaan teʼ bibliotecaoʼ?