Ñuuláʼdxiluʼ ñánnaluʼ jma de ni rusiidiʼ Biblia la? Ñuuláʼdxiluʼ ñánnaluʼ jma de xiixa versículo stiʼ Biblia, de tuuxa binni ruzeeteni, de xiixa lugar o de xiixa relatu ruzeeteni la? Ñee huaníʼ íqueluʼ pa zanda gacané Stiidxaʼ Dios lii para guni chaahuiluʼ xiixa guendanagana nápaluʼ la? Pa zacá ni, galán iquiiñeluʼ biblioteca ni nuu ndaaniʼ Yoo stiʼ Reinu.

Ndaaniʼ biblioteca riʼ ridxéladu ni racané laadu guidúʼndadu ni racaláʼdxidu. Zándaca qué gápaluʼ guiráʼ libru ne revista ni maʼ gulee ca testigu stiʼ Jiobá lu stiidxaluʼ, peru biblioteca ni nuu ra Yoo stiʼ Reinu nápani stale de ca libru ne revista ni nacubi biree. Ne laaca zándaca nápani stale clase Biblia, ti diccionariu ni nabé jneza rusiene diidxaʼ, ne xcaadxi libru ni rusiene de gadxé gadxé tema. Zanda iquiiñeluʼ cani ante ne despué de guiluxe guendaridagulisaa. Pa nuu ti computadora ndaaniʼ biblioteca riʼ, zándaca maʼ guluucabe programa ni láʼ Watchtower Library luni, ne lu programa ca zeeda stale de ca libru ne ca revista ni nápadu, ne cadi nagana diʼ para guidxélaluʼ xiixa tema, xiixa diidxaʼ o versículo luni.

Nabé racaneni cani rutiidiʼ libana lu Xhiiñaʼ Dios ne modo nabáninu. Pa maʼ cá laluʼ para tiidiluʼ lu scuela riʼ la? zanda iquiiñeluʼ cani nuu ndaaniʼ biblioteca riʼ para cueeluʼ libana stiluʼ. Superintendente stiʼ reunión Xhiiñaʼ Dios ne modo nabáninu nga encargadu stiʼ biblioteca riʼ, ne laaca naquiiñeʼ gúʼyabe gata chaahuiʼ cani. Binnigola ca o Testigu ni ruundané lii zanda guluíʼ lii ximodo guidxélaluʼ ni caquiiñeluʼ. Ne galán gánnaluʼ qué zanda diʼ cueeluʼ ca libru ca de ndaaniʼ Yoo stiʼ Reinu; ne naquiiñeʼ chuʼluʼ cuidadu cani ne cadi guzaaluʼ raya lúcani.

Biblia na para ganda gunibiáʼ chaahuinu Dios la? naquiiñeʼ quixhe íquenu guyúbinu laabe casi ñaca nuyúbinu «tesoro ni gaʼchiʼ» (Proverbios 2:1-5). Ne ti lugar ra zanda guyubi binni de xiixa tema ni racalaʼdxiʼ ganna nga ra biblioteca ni nuu ndaaniʼ Yoo stiʼ Reinu.

• Xi guiráʼ napa biblioteca ni nuu ndaaniʼ Yoo stiʼ Reinu ni racané laadu guidxéladu tema ni racaláʼdxidu gánnadu.

• Tu laa zanda gusiidiʼ lii iquiiñeluʼ biblioteca ni nuu ndaaniʼ Yoo stiʼ Reinu.