Yesu Kirisi u be ba wi swĩi sɔ̃ɔwa u nɛɛ: “I de bɛɛn yam bururam mu burura tɔmbun wuswaaɔ kpa ba n ka bɛɛn sɔm geenu waamɔ, kpa bu wa bu bɛɛn Baaba wɔrukoo bɛɛrɛ wɛ̃.” (Mateu 5:16) Swaa ye sɔɔwa, sa yirikisin sɔm yãa kpaanu loo mɔ̀ dee dee, nin teena intɛɛnɛti. Intɛɛnɛtin ayee te ba mɔ̀ jw.org ta sãawa ayee gee te sɔɔ ba ra labaari mɔrisie Yehofan Seeda Diobun naanɛ ka ben sɔma sɔɔ. Mba sa ra wa ayee te sɔɔ?

Bibelin wisibu, gari yi tɔn dabinu ba ra tii bikie sɔɔ. Kaa kpĩ a wisibu wa gari giri dabi ni tɔmbu ba ra tii bikie sɔɔ. Nge weenasia, tire kambinu ni ba mɔ̀ Wahala ya koo raa sɔ̃ɔ teeru kpee ro? ka Gɔribu ba koo kpĩ bu wurama wãaru sɔɔ ka gem? nu wãa intɛɛnɛti sɔɔ ka barum nge 600 n saka. Kaa kpĩ a maa Bibelin tusia te ba mɔ̀ ka faransem Traduction du Monde Nouveau wa mi ka barum nge 130 n saka, ka maa tire dabinu ni nu koo nun somi Bibelin keu sɔɔ, tireru nge Labaari gea ye ya wee saa Gusunɔn min di ka maa tire ni ba ra yare suru ka suru ni ba mɔ̀ La Tour de Garde ka Réveillez-vous! ka faransem. Kpara nin dabina wãa intɛɛnɛtin ayee te sɔɔ, ni kaa kpĩ a gari, ǹ kun mɛ a swaa daki dɔsa sɔɔ, ǹ kun maa mɛ a kasu a yara yirikisin sɔm yãnu yiri yiri ni tɔmbu ba ra loo ko ba sɔɔ, nge MP3, PDF, ǹ kun mɛ EPUB. Kaa maa kpĩ a nin ganu yara tire wurusu sɔɔ, a ka be ba kĩ bu yɛ̃ru sosi Bibeli sɔɔ bɔnu ko ka ben tiin barum! Ba maa fideo dabinu kpara sosobun barum sɔɔ. Kaa kpĩ a Bibelin garibun dɔsa ǹ kun mɛ Bibelin faagi gaan fideo yara, ka dɔsi dori a ka wunɛn wɛ̃rarun saa tɔm sosi.

Labaari gɛɛ Yehofan Seeda Diobu sɔɔ. Ayee te sɔɔ, ba ra maa labaari kpɛɛ, ka fideo piiminu mɔrisie, yi yi bɛsɛn sɔmburu tem kpuro sɔɔ sɔ̃ɔsimɔ, ǹ kun mɛ gãanu yi yi Yehofan Seeda Diobu deema nɔɔsiamɔ, ka maa somi te sa ra ka tɔmbu daawe wahalan saa sɔɔ. Kaa maa bɛsɛn mɛnnɔ baka si su ween labaari wa mi, ka bɛsɛn gbankɔkɔn kãasin yadɛrɛsiba.

Amɛniwa, sa ka gem bururasiamɔ baa min toma tem mɛ sɔɔ. Tem kpuron tɔmbu, sere ka mi ba mɔ̀ Antartique ɔ, ba yen are dimɔ. Sa Yehofa Gusunɔ kanamɔ Win “gari yi wa yi kparara fuuku” baama kpuro temɔ, kpa Win yiiko yu kpɛ̃a yu sosi.—2 Tɛsalonika 3:1.

• Amɔsunwa jw.org ya ra tɔn dabinu somi bu ka Bibelin gem tubu?

• Mba a kĩ a kamɛ bɛsɛn intɛɛnɛtin ayeru sɔɔ?