IRUẸMWI 28
De Emwi Nọ Rre Wẹbsait Ọghe Ima?
France
Poland
Russia
Jesu keghi tama erhuanegbe ẹre wẹẹ: “Wa gie ukpa [uwa] gha ba ẹse vbe odaro agbọn, ne iran miẹn ehe na lekpa uyinmwẹ esi ne uwa yin, gha rho Erha uwa nọ rre ẹrinmwi.” (Matiu 5:16) E tẹknọlọgi ughughan kevbe intanẹt ne ima loo, ọre odẹ ọkpa ne ukpa ọghe ima ya ba. E wẹbsait ọghomwa nọ re jw.org, ẹre a na miẹn ayahọmwaehọ nibun ni dekaẹn iyayi kevbe iwinna ọghe Avbe Osẹe Jehova. De usun emwi ni rre wẹbsait na?
Ewanniẹn ọghe avbe inọta ne emwa mobọ nọ. U gha miẹn ewanniẹn ọghe avbe inọta ne kpataki ne emwa mobọ nọ vbe wẹbsait na. Vbe igiemwi, u gha miẹn asobọrrie eva na, vbe urhuẹvbo nọ gberra 700 vbe wẹbsait ọghe ima: Usẹ Gha Fo Ẹdẹ Ra? kevbe Emwa Ni Wulo Nẹ, Gha Gele Werriegbe Do Ghaa Rrọọ Ra? U gha vbe miẹn e Baibol ọghe ima, nọ re New World Translation kevbe avbe ebe na ya maa emwa emwi, vbe na ghee De Emwi Ne Baibol Gha Sẹtin Maa Ima Re? vbe urhuẹvbo nọ gberra 150 vbe wẹbsait na. Avbe ebe Owa Ọkhẹ kevbe Awake! ni da ladian vbe rre evba. U sẹtin tie avbe ebe na vbe wẹbsait ọghe ima, u sẹtin danmwehọ re, u sẹtin vbe danlod ẹre vbe odẹ ughughan, vbe na ghee MP3, PDF ra EPUB. U gha vbe sẹtin print ipapa eso ladian vbe urhuẹvbo ọghe ọmwa nọ mwẹ ẹkorhiẹnrhiẹnmwẹ ye iwinna ima. E vidio wa vbe bun vbe urhuẹvbo ekhakha (sign language). U gha vbe sẹtin danlod ako ọghe Baibol na tiere vbe na ghee ikueta, ikueta ọghe Baibol kevbe ihuan nibun na ya sọyẹnmwẹ egbe.
Ẹmwata nọ dekaẹn Avbe Osẹe Jehova. Emwi ọvbehe na miẹn vbe wẹbsait ọghe ima, ọre vidio ni da ladian kevbe iyẹn ni dekaẹn iwinna ima vbe uhunmwu otagbọn hia, emwi nọ sunu daa etẹn ima eso kevbe iyobọ ne ima ru ne etẹn kevbe emwa ọvbehe ni gele gualọ iyobọ. Ayahọmwaehọ nọ dekaẹn asikoko nọkhua nọ dee kevbe efon nọmba ọghe abotu ughughan vbe rre wẹbsait ọghomwa.
E wẹbsait ọghomwa wa ya ukpa ọghe ẹmwata ba sẹ ehe ni wa kakabọ khian fua vbe otagbọn na. Emwa ni rre otọ ẹvbo nọ ghi khian fua sẹ kevbe nọ ghi gbe oni sẹ, na tie ẹre Antarctica, wa vbe miẹn afiangbe vbe wẹbsait na. Erhunmwu ne ima na, ọre ne ẹmwẹ Osanobua gha vẹwae khian kevbe ne emwa hia gha rhie uyi ne Osanobua vbe otagbọn hia.—2 Tẹsalonaika 3:1.
-
De odẹ ne jw.org ya ru iyobọ ne emwa nibun ya do rẹn odẹ ọghe ẹmwata?
-
De emwi eso ne u gha hoo ne u ya gualọ vbe wẹbsait ọghe ima?
You May Also Like
VBENE A YA LOO WẸBSAIT ỌGHOMWA
Vbene A Ya Loo E JW.ORG
Gualọ iyobọ ọghe vbene a ya loo emwi ni rre jw.org. Loo ayahọmwaehọ nọ rre ako ne a na maa ọmwa vbene a ya loo nene wẹbsait hẹ kevbe azẹvbiro eso ne u gha sẹtin lele, vbe u ghaa loo e wẹbsait na, vbe u ghaa gualọ emwi vbọ kevbe vbe u gha khian danlod emwi vbọ. Gualọ ewanniẹn na rhie ye ọta ne emwa nọ vbekpae jw.org.
IWINNA IKPORHU IYẸN NỌMA
Vbene a ya Loo JW.ORG ya Wewe, ne Igiuhun Ọghe Baibol
Ọ keghi wa yẹẹ Avbe Osẹe Jehova, ke ibiẹka ke eniwanrẹn ne iran gha loo e wẹbsait ọghe iran na dọlọ mwamwa, ya kporhu iyẹn nọma ọghe Arriọba Osanobua ma emwa nibun.
