Si Jesus ya habla na su maga siguidores: “El de ustedes luz necesita alumbra na presencia del maga gente para puede sila mira el de ustedes maga buen trabajo, y ay dale sila alabanza con el de ustedes Tata na cielo.” (Mateo 5:16) Para puede se cumpli, ta usa kame con el moderno tecnologia, incluido el Internet. El oficial Website del maga Testigo de Jehova amo el jw.org. Puede tu qui saca informacion acerca el diamon maga actividad y si cosa kame ta creé. Cosa tu puede mira qui?

El contestacion del Biblia na maga importante pregunta. Puede tu incuntra el contestacion na cuanto del maga bien importante pregunta del maga gente. Por ejemplo, puede mira online con el maga folletto Tiene ba Fin el Sufrimiento? y Puede pa ba Vivi Otravez el Maga Muerto? na mas de 600 lengguaje. Talla tambien el New World Translation na mas de 130 lengguaje y cuanto del maga publicacion que ta usa para estudia con el Biblia, igual el Cosa Kanaton Puede Enseña el Biblia? y el maga reciente edicion del The Watchtower y Awake! Mucho de este maga publicacion puede le o oi online y puede man download na format de MP3, PDF o EPUB. Puede pa gane tu imprimi cuanto del maga pagina de ese para dale con el un interesao persona na su mismo lengguaje! Tiene tambien maga video na mucho lengguaje de señas. Puede tu man download audio drama del lehida de Biblia, drama na Biblia y maga bonito cancion.

Deverasan informacion acerca na maga Testigo de Jehova. Puede tu mira con el maga reciente noticia y video acerca na diamon maga trabajo na entero mundo, suceso que ta afecta con el maga Testigo de Jehova y si cosa ayuda kame ta dale. Tiene tambien informacion acerca na maga venedero asemblea y si paquemodo puede man contact con el maga oficina del maga Testigo de Jehova.

Por medio con ese, ta puede kame alumbra el luz del verdad hasta na de con todo lejos parte del tierra. El maga gente quien ta queda na maga continente igual na Antartica ta puede beneficia. Ta reza kame que “el mensaje del Señor [Jehova] ay man calayat pronto” na entero parte del mundo para na gloria del Dios.—2 Tesalonica 3:1, El Nuevo Testamento.

• Paquemodo el jw.org ta ayudá na mas manada gente aprende el verdad na Biblia?

• Cosa tu quierre mira na diamon Website?