Jesus Kraist a ereni néún kewe chón káé: “Iei usun ämi saram epwe tittin mwen ekewe aramas, pwe repwe küna ämi föför mürina o mwareiti Sememi lon läng.” (Mateus 5:16) Ina popun, aua áeáfichi ekkewe minen computer, kapachelong ewe Internet. Lón ewe website, jw.org, a mak minne Chón Pwáraatá Jiowa ra lúkú me féfférúr. Ikkefa ekkena pwóróus a nóm lón?

Pélúwen ekkewe kapas eis aramas ra kan eáni me ren Paipel. Ka tongeni kúna pélúwen ekkóch me lein ekkewe kapas eis mi kon lamot aramas ra fen eáni. Áwewe chék, ekkewe tract Itá Riáfféú Epwe Úkúló? me Ekkewe mi Máló Repwe Tongeni Wesewesen Manawsefál? mi kawor wóón Internet lón lap seni 600 fósun fénú. A pwal nóm ewe Paipel New World Translation lón lap seni 130 fósun fénú, pwal chómmóng puken álillis le káé Paipel, kapachelong Met ewe Paipel A Wesewesen Apasa?, me ekkewe mineféén Awake! me Ewe Leenien Mas. Chómmóng lein ekkeei puk ka tongeni álleani are aúseling wóón Internet. Ka pwal tongeni kapiinawu lón ewe napanap kopwe aúseling ngeni are álleani lón MP3, PDF are EPUB. Ka pwal mwo nge tongeni printini fitaché pekin taropwe fán iten emén mi mochen káé lón pwisin an fós! A pwal kawor ekkewe puk mi fich lón fitio lón fitu fósun pwoomw (sign language). Ka pwal tongeni kapiinawu ekkewe álleaan Paipel mi usun sipai, nikáttik mi echipwér me ekkewe sipain pwóróus lón Paipel, iwe kopwap pwapwaiti le aúseling mwirin.

Pwóróus usun Chón Pwáraatá Jiowa. A pwal nóm lón ewe website ekkewe mineféén pwóróus me ekkóch fitio mi chék mwoch usun ám angang wóón unusen fénúfan, ám angangen álisi aramas mi nóm lón weires, me ekkewe pwóróusen fénúfan mi kkúú Chón Pwáraatá Jiowa. Ka pwal tongeni kúna ineet ekkewe mwichelap repwe fis me án ám kewe keangen ofesilap address.

Ren ekkeei mettóch, aua etina saramen ewe enlet ngeni ekkewe fénú mi fókkun tottowau. Aramas seni eú me eú fénú kapachelong Antartica, ewe fénú mi kon tottowau mi fókkun patapat, ra kúna feiéch seni. Aua iótek pwe “än ewe Samol kapas epwe müttir chöfetal” wóón unusen fénúfan pwe iten Kot epwe lingeló.​—2 Tesalonika 3:1.

• Ifa usun ewe jw.org a kan álisi chómmóng aramas le silei ewe enlet lón Paipel?

• Met ka mochen kopwe katol lón ám we website?