Jesus Christ ama ọdọhọ mme anditiene enye ete: “Ẹyak un̄wana mbufo ayama ke iso owo, man mmọ ẹkpekụt nti utom mbufo ẹnyụn̄ ẹnọ Ete mbufo emi odude ke heaven ubọn̄.” (Matthew 5:16) Man inam emi, nnyịn imada n̄kpọ oro ifiọk ntaifiọk ẹsion̄ode ẹdi ndondo emi, esịnede Intanet, inam n̄kpọ. Ikpehe Intanet nnyịn, jw.org/efi, edi ebiet emi ẹdọn̄de ntọt oro aban̄ade se Mme Ntiense Jehovah ẹnịmde ke akpanikọ ye se mmọ ẹnamde. Nso ke ẹkeme ndikụt do?

Mme ibọrọ oro Bible ọnọde ke mme mbụme oro ẹsiwakde ndibụp. Afo emekeme ndikụt ibọrọ ndusụk akpan mbụme oro mme owo ẹsibụpde. Ke uwụtn̄kpọ, tract emi Ndi Ufen Eyetre Tutu Amama?, ye Ndi Mme Akpan̄kpa Ẹkeme Ndifiak Ndu Uwem? odu ke jw.org ebe usem 600. Afo emekeme n̄ko ndikụt Edikabade Eke Obufa Ererimbot mbe usem 130, onyụn̄ okụt ediwak n̄wed un̄wam ukpep Bible, esịnede Nso ke Bible Ekpep Nnyịn? ye mme Enyọn̄-Ukpeme ye Ẹdemede! eke ndondo emi. Ẹkeme ndikot mîdịghe ẹkop nte ẹkotde ediwak ke otu n̄wed emi ke Intanet. Ẹkeme ndision̄o mbon oro ẹkekotde ke uyo ẹdọn̄ ke Intanet m̀mê mbon oro ẹkedọn̄de nte PDF m̀mê EPUB. Afo amakam ekeme ndimịn̄ ndusụk page nda nnyene nneme ye owo emi enyenede udọn̄, ke usem esie! Mme vidio ẹdu ke ediwak usem idiọn̄ọ. Afo emekeme ndision̄o Bible oro ẹkotde nte drama, mme drama Bible, ye ndinem ikwọ man akpan̄ utọn̄ okop ke ini nduọkodudu fo.

Nnennen ntọt oro aban̄ade Mme Ntiense Jehovah. Mme mbụk ye mme vidio utom oro inamde ke ofụri ererimbot ke ndondo emi, mme n̄kpọntịbe oro ẹban̄ade Mme Ntiense Jehovah, ye un̄wam oro nnyịn isinọde ke mme ini afanikọn̄, ẹdu ke ikpehe Intanet nnyịn n̄ko. Oyokụt n̄kpọ aban̄ade mbono district oro edide onyụn̄ okụt adres ye nọmba telefon mme n̄kọk itieutom nnyịn.

Ke mme usụn̄ emi ke inam un̄wana nnyịn ayama esịm ata nsannsan ikpehe isọn̄. Mme owo ke kpukpru ikpehe ke isọn̄, esịnede Antarctica, ẹtiene ẹbọ ufọn. Nnyịn ibọn̄ akam ite “ikọ Jehovah akpakam aka iso ndisuana usọp usọp” nsịm ofụri isọn̄ nnyụn̄ nnọ Abasi ubọn̄.—2 Thessalonica 3:1.

• Didie ke jw.org/efi an̄wam mme owo ẹkpep akpanikọ?

• Nso ke afo akpama ndika n̄kese ke ikpehe Intanet nnyịn?