Jesus kãa kyerɛɛ n’ekyirdzifo no dɛ; “Hom mma hom kan no nhyerɛn wɔ nyimpa enyim, ma woeehu hom ndwuma pa na wɔaahyɛ hom Egya a ɔwɔ sor enyimnyam.” (Matthew 5:16) Iyi ntsi yɛdze abaɛfor mfirdwuma ridzi dwuma yie a Intanɛt kã ho. Hɛn wɛbsaet jw.org, no yɛ Intanɛt dwumadzibea a ibenya nsɛm a ɔfa Jehovah Adasefo hɔn gyedzi nye dwumadzi ahorow ho wɔ hɔ. Nsɛm no bi nye dɛn?

Mbuae a Bible no dze ma wɔ nsɛm a wɔtaa bisa ho. Ibotum enya nsɛm a no ho hia kyɛn biara a nkorɔfo ebisa pɛn no mu bi ho mbuae. Dɛ nhwɛdo no, nkrataaba a wɔato dzin Ana Amandzehu Bɛba Ewiei Dabi? nye Ana Ewufo Bɛsan Atsena Ase Bio Ampa? no wɔ kasa bɔbor 600 mu wɔ hɛn wɛbsaet do. Ibotum so enya New World Translation no wɔ kasa bɔbor 130 mu. Nwoma ahorow a yɛdze sũa Bible a ibi nye Asɛmpa A Ofi Nyankopɔn Nkyɛn! nye The Watchtower nye Awake! a wɔaba fofor so wɔ hɔ. Nwoma ahorow yi mu pii wɔ hɔ a ibotum akenkan anaa abɔ etsie wɔ Intanɛt no do. Ibotum so atwẽ ne MP3, PDF, anaa EPUB. Hokwan so wɔ hɔ dɛ itsintsim nkrataafã kakra, na enye obi a n’enyi gye ho akyɛ wɔ ne kasaa mu! Hɛn nwoma ahorow a wɔakyerɛ ase akɔ mmum kasa ahorow pii mu a wɔayɛ no video so wɔ hɔ. Ibotum so atwẽ Bible akenkan a wɔayɛ no dɛ drama, Bible mu nsɛm a wɔdze ayɛ drama, nye ndwom a ɔyɛ ahomkã a edze bɔdwedwe woho.

Jehovah Adasefo ho nokwasɛm. Ndzɛmba a ɔwɔ Intanɛt yi do so bi nye amandzɛɛbɔ na video ahorow a wɔaba fofor a ɔfa hɛn wiadze nyina edwuma no ho, nsɛm a ɔfa Jehovah Adasefo ho, nye mboa a yɛdze ma wɔ atoyerɛnkyɛm ber mu. Ibotum so ehu ehyiadzi ahorow a yɛrebɛyɛ ho nkaabɔ nye hɛn edwumayɛbea nkorbata ahorow no ho adrɛɛse.

Yɛnam iyinom do rema nokwar kan no ahyerɛn akɔ ekyirekyir ekodu asaase ano noho. Nkorɔfo fi asaasepɔn biara do a Antarctica so kã ho rinya iyi do mfaso. Ɔyɛ hɛn mpaabɔ dɛ “Ewuradze asɛm ntu ntsen” ntsɛntsɛm nkɔ asaase do beebiara mfa nhyɛ Nyankopɔn enyimnyam.​—2 Thessalonicafo 3:1.

• Ebɛn kwan do na jw.org roboa nyimpa pii ma woeesũa Bible mu nokwar no?

• Ebɛnadze na ebɛpɛ dɛ ehwehwɛ wɔ hɛn wɛbsaet no do?