E tuangia taan rimwina Iesu ni kangai: “Kam na kaotiota . . . ami oota i mataia aomata, bwa a na nori ami mwakuri aika raraoi ao a na neboa iai Tamami are i karawa.” (Mataio 5:16) Ibukini kakororaoan anne, ti a kabonganai rabakau aika boou n ikotaki naba ma te Internet. Ara atureti ae kakawaraki n te Internet ae jw.org, bon te tabo ae ko kona ni wareka iai aia koaua ao mwakuri aika kakaraoi Ana Tia Kakoaua Iehova. Tera kanoan te atureti anne?

Kaeka man te Baibara ibukin titiraki aika taabangaki. Ko kona ni karekei kaekaan titiraki tabeua aika rangi ni kakawaki, ae a aki toki aomata n tititiraki iai. N te katoto, turaeki aika Iai te Tai ae E na Akea Iai te Rawawata? ao A Kona ni Manga Maiu Maate? a tauraoi n te intanete, n taetae aika raka i aon 600. Ko kona naba n nora iai Te Baibara ae Tabu—Te Rairai ae te Aonnaba ae Boou n taetae aika raka i aon 130, bwaai n ibuobuoki ibukin te reirei n te Baibara, n ikotaki naba ma te boki ae Tera Ana Reirei ni Koaua te Baibara? ao kaongora aika boou mani maekatin aika Te Taua-n-Tantani ao te Awake! A kona ni warekaki ke n ongoraeaki man te Internet angiini booki aika a a tia ni boreetiaki aikai, ke a kona naba n anaaki man te Internet baike a tia n raweaki aika a tei bwa te MP3, PDF, ke te EPUB. Ko kona naba ni boreeti tabeua iteraniba ibukin am maroro ma te aomata ae kan ongora n oin ana taetae! A tauraoi DVD n taetae aika bati ibukia naake a taetae n te bai. Ko kona naba ni karekei man te Internet, te wareware n te Baibara ae e a tia n raweaki, kaotioti aika boto man te Baibara, ao katangitang aika tangiraoi aika ko kona ongoraei n am tai ni kaokirii.

Rongorongo aika koaua ibukia Ana Tia Kakoaua Iehova. E karinaki naba n te atureti anne rongorongo aika boou ao taamnein aia mwakuri Ana Tia Kakoaua Iehova ni katobibia te aonnaba, baika a riki nakoia, ao aia kakorakora n ibuobuoki nakoia ake a rotaki ni kabuanibwai aika karina. Ko kona naba n nori iai taini bwabwaro aika a na karaoaki ao atureti aika bati ibukin ara aobiti n tararua.

Ni karaoan aei, ti a kaotaa nako iai ootan te koaua nakon aaba aika raroa kinokino. A kakabwaiaaki iai aomata man aaba nako aika bubura n ikotaki ma Antartica. Ti tataroakinna bwa e na “waekoa butinakon ana taeka Iehova” i aon te aba ni kabutaa, ibukin neboan te Atua.—2 I-Tetaronike 3:1.

• A kangaa aomata aika bati ni buokaki n te atureti ae jw.org bwa a na reiakina te Baibara?

• Tera ae ko kani kakaaea n ara atureti ae kakawaraki n te Internet?