Ketsuútsi yutɨɨriyama pɨtiwarutahɨawixɨ: «Xeheetsíe hekɨariya xetenehekɨatani ʼuukitsi wahɨxie, ʼaixɨ yeme tiʼaneeme xeheetsíe memɨtexeiyanikɨ metá ʼaixɨ mɨtiuxaxaatsiwanikɨ xeYeu mɨyuawitsíe makawe» (Mateo 5:16). ʼAyumieme hiikɨ tita mɨtixuawetsíe tepɨteʼanayeneneetɨwa, Internet hepaɨ. Sitio jw.org Jehová Niukíeya memɨkuxaata pɨtiwapini, mana pɨraxaxaata titatsíe memɨteʼerie metá kememɨteyurié. ¿Tita mana petiukaxeiyawe?

ʼEiyarikate Bibliatsíe tita waɨkawa mɨtikuʼiwauriwa. Pepɨkaxeiya ʼeiyarikate tita teuteri kwinié memɨteheumaiku. ʼIkɨ ʼiwaurikate hepaɨ, ¿Rayeʼaní tuukaari tekateʼukaʼeniwatɨri temuʼuwani? ¿Tiyɨwe tawaarié tuukaari mehexeiyatɨ memaakɨɨné teuteri memeutakwixɨa? Pepɨyɨwe pemenakahapani tasitio Internettsíe 600 niukikɨ ʼanutihukametsíe. Tsiere pepɨyɨwe pemanakahana Traducción del Nuevo Mundo, 130 niuki yɨɨkɨ ʼaneneeme ʼanutihukame mɨʼutɨarietsíe; nutsɨ waɨkawa xapate Biblia temɨteʼuyutiʼɨɨkitɨwatsíe mieme, xapa ¿Qué enseña realmente la Biblia? xapate Atalaya metá ¡Despertad! hehekwatɨ manayeneika, waɨkawa xapate ʼeena mayehú hepaɨ pepiʼeniewe metá pepekaterɨwawe Internettsíe, nutsɨ pepenakahapawe MP3, PDF nutsɨ EPUB tsíe. Xɨka mɨpaɨ petinakeʼerieka pepenayehapawe ʼaniukikɨ xapatsíe, xeime pemexeiyatsitɨanikɨ Yuútsi Niukieyatsíe reumaimɨkɨme. Tsiere pɨxuawe video memɨkaniuwawe metá memɨʼenawawe waheetsíe mieme tsiere pepanakahapawe Drama terɨwarikate Yuútsi Niukíeya heetsíe mieme metá kwikari tsiʼanɨyɨtɨkaitɨ́ pemitiʼeniwanikɨ pemekahɨkatsíe.

Mana pɨraxaxaatsiwa Jehová Niukíeya memɨkuxaata kememɨteʼanuyehú. Tasitio Internettsíe pepɨtikaxeiya tita tihehekwatɨ tahetsieké mɨranayené metá video tikuxaatame ketemɨteyurietsíe, kememɨteʼanuyehú naitsarie taʼiwama, nutsɨ hiipame kehepaɨ temɨtewapareewie. Tsiere paxaxaata kepauka xeɨritsikate xei witaari ʼanukayeikakaku mutiweewiwa metá mana payemié xɨka peheuniumɨkɨni sucursal meutiʼutɨkatsíe.

Pampariutsi hiikɨ yatiʼaneneetɨ mɨtixuawekɨ, pɨtikuyuruwa tita mɨtiyuri mɨyukuhekɨkɨareni kwinié tewa kwieepatsíe, meyuwaɨkawatɨ teuteri niuki memetimamatenikɨ, Antártida paitɨ. Tepɨyunenewie «Jehová Niukíeya yepauka mukuxaxaatsiwanikɨ» naime kwieepatsíe, meyunaitɨ memenɨawanikɨ (2 Tesalonicenses 3:1).

• ¿Ketiwakupareewiwa tasitio jw.org meyuwaɨkawatɨ teuteri mɨtiyuri Bibliatsíe memɨtehetimamatenikɨ?

• ¿Tita pereuwaumɨkɨ tasitio Internettsíe?