Jesus Kristus wa raera ovahongewa ve kutja: “Nu momuhingo tjingewo ondjerera yeṋu ngai yere komurungu wovandu, kokutja owo ve mune oviṋa oviwa mbi mamu tjiti, nu ve hivirike Iho ngu ri meyuru.” (Mateus 5:16) Momuano mbwi, otji tu ungurisa ounongo woviungura wakandino tjimuna orungovi. Orungovi rwetu rwokotjiveta ku mo yenene okumuna ondjiviro ohunga nongamburiro novitjitwa vyOvahongonone vaJehova, orondwi: www.pr418.com/hz. Morungovi ndwi mo vaza mo tjike?

Omaziriro okuza mOmbeibela komapuriro nge purwa tjinene ndino. Ove mo yenene okumuna omaziriro komapuriro tjiva omananḓengu ovandu ngu ve pura. Okutara kotjihorera, oumbapira mbwi Okumuna omauzeu mape ya aku yanda? na Ovaṱi mape ya tjiri ave kara nomuinyo rukwao? u munika morungovi rwetu momaraka wokombanda 600. Wina mo yenene okuvaza Ombeibela ndji o-New World Translation momaraka wokombanda 130 nomambo tjiva nge ungurisiwa okukonḓonona Ombeibela tjimuna embo ndi Ombeibela tjiri i honga tjike? nokambo nga Oruhungu na inga Awake! Otjingi tjomambo nga mo yenene okupuratena poo okulesa morungovi poo okuisa mo otjovipuratenwa, mozombuniko nḓe tjiukwa nawa tjimuna o-MP3, o-PDF, poo o-EPUB. Ove wina mo yenene okupirinda ozombapira tjiva kutja u kayandje komundu ngwa raisa ombango meraka re! Omambo nga tuwa mozovidio wina ye munika momaraka wozomboro. Morungovi wina mo yenene okuisa mo omalesero wOmbeibela nge lesewa momuano wovinyandwa, nomanyando wOmbeibela nomizumbi omiwa okupuratena tji wa suva.

Ondjiviro youatjiri ohunga nOvahongonone vaJehova. Wina mo vaza mo ombuze ombe nozovidio ohunga noviungura vyetu mouye, ovitjitwa mbi mavi ṱunu kOvahongonone vaJehova nozongondjero zetu zokuyama ovandu. Mo vaza mo ondjivisiro ohunga nomaworonganeno omanene ngu maye kara ko nozonomora ku mo yenene okuhakaena notutavi twomberoo yetu.

Okupitira moviṋa avihe mbi, eṱe tu yerisa ondjerera youatjiri motupa twokokure mouye. Ovandu momahi aehe, nandarire imba mbe ri moAntarktika ve zuva ombuze yaMukuru. Eṱe tu kumba kutja “embo raMuhona ri handjauke tjimanga” mouye auhe kohiviro ye.​—2 Ovatesalonika 3:1.

• Orungovi ndwi jw.org, ru vatera vi ovandu ovengi okurihonga ouatjiri wOmbeibela?

• Otjikwaye tjotjo vanga okukonḓonona morungovi rwetu?