Yesũ Klĩsto eeie aatĩĩi make: “Kyeni kyenyu nĩkĩkenae mbee wa andũ, nĩ kana mone mawĩa menyu maseo, na kũmũtaĩa Ĩthe wenyu ũla wĩ ĩtunĩ.” (Mathayo 5:16) Nĩ kana twĩke ũu, nĩtũtũmĩaa nesa maendeeo ma ĩvinda yĩĩ ala meũlikya nthĩnĩ Indaneti. Kĩsese kitũ kya Indaneti, jw.org/kam, nĩkyo kĩsese kĩtĩkĩlye kya kũkwata ũvoo ĩũlũ wa mũĩkĩĩo na ũthũkũmi wa Ngũsĩ sya Yeova. Kĩthĩawa na maũndũ meva?

Mosũngĩo ma makũlyo ma Mbivilia ala makũlaw’a mũno. Nũtonya kũkwata mosũngĩo ma makũlyo amwe ma vata vyũ ala andũ methĩwa maakũlya. Kwa ngelekany’o, tulakiti ĩĩ, Mo Mathĩna Makathela? na Mo Andũ Ala Makwie Nĩmatonya Kwĩthĩwa Thayũ Ĩngĩ? nialyũlĩtwe kwa ithyomo mbee wa 600 na ikekĩkwa Indanetinĩ. Ĩngĩ nũtonya kwĩthĩa Mbivilia ya Tafsiri ya Ulimwengu Mpya kwa ithyomo mbee wa 130 na mavuku angĩ ma kwĩmanyĩsya Mbivilia, vamwe na ĩvuku Mbivilia Yo Ĩmanyĩasya Ata? na makaseti ala ma mĩtũkĩ ma Mũsyaĩĩsya na Amkeni! Mavuku maingĩ katĩ wa asu nũtonya kũmasoma kana kũmethukĩĩsya maisomwa Indanetinĩ, kana kũmaumya Indanetinĩ me mũthemba wa MP3, PDF, kana EPUB. O na nũtonya kũmũkyavĩthĩsya mũndũ ũkwendeew’a mathangũ mate maingĩ kwa kĩthyomo kyake! Ve vitio sya ithyomo mbingĩ kwa ala au matũ. Nũtonya kumya Indanetinĩ ndulama sya Mbivilia sya kũsoma, ndulama sya Mbivilia sya ĩvinda ya tene, na mbathi sya kwendeesya ila ũtonya kũtũmĩa kwĩtanĩthya.

Ũvoo wa w’o ĩũlũ wa Ngũsĩ sya Yeova. Ĩngĩ Kĩsesenĩ kĩu ve maũvoo ma mĩtũkĩ na vitio ĩũlũ wa wĩa witũ wa nthĩ yonthe, maũndũ ala makonetye Ngũsĩ sya Yeova, na ũndũ tũtetheeasya andũ ĩvinda ya mũisyo. Nũtonya kũkwata ũvoo ĩũlũ wa maũmbano ma kĩvalo vala makethĩwa na ũndũ ũtonya kũneena na maovisi maitũ ma ũvonge.

Kwa nzĩa isu, nĩtũendee kũnyaĩĩkya ũw’o kũndũ kũasa mũno ĩũlũ wa nthĩ. Andũ kuma kũndũ kw’onthe o na Antarctica, nĩmatethekete. Twĩvoya “ndeto ya Mwĩaĩi ĩtonye ũthi ĩsembete” ĩũlũ wa nthĩ yonthe, nĩ kana Ngai ataĩwe.​—2 Athesalonika 3:1.

• Kĩsese kya jw.org/kam kĩtetheesye ata andũ aingĩ kwĩmanyĩsya ũw’o wa Mbivilia?

• Nĩ kyaũ ũtonya kwenda kũmanya nthĩnĩ wa kĩsese kitũ?