U Jisu Khrist u ong ha la ki nongbud: “To pynshai kumta ia ka jingshai jong phi ha khmat ki briew, ba kin iohi ia ki jingleh babha jong phi bad ioh iaroh ruh ia U Kpa jong phi uba ha ki bneng.” (Mathaios 5:16) Ha kaba ïa dei bad kata, ngi la pyndonkam ïa ki kor treikam ba mynta, kaba kynthup ïa ka Internet. Ka website jong ngi, ka jw.org ka dei ka online kaba ai jingtip shaphang ka jingngeit bad ka rukom treikam ki Nongsakhi U Jehobah. Ka kynthup ïa kiei?

Ka jubab jong ka Baibl ïa ki jingkylli ba ju kylli barabor. Phi lah ban shem ïa ki jubab jong ki jingkylli bakongsan tam ba ki briew ki ju kylli. Kum ka nuksa, ki trak Hato Ki Jingjynjar Kin Kut Mo? bad Hato Kiba Ïap Ki Lah Shisha Ban Im Biang? ki don ha palat 600 tylli ki jait ktien ha online. Phi lah ruh ban shem ïa ka Jingpynkyllaktien Pyrthei Bathymmai ha palat 130 tylli ki jait ktien bad kiwei ki kot kiba ïarap ban sngewthuh ïa ka Baibl, kaba kynthup ïa ka kot Kiei ki Jinghikai Bashisha jong ka Baibl? bad ïa ki makasin bathymmai jong ka Kut Ap Phira bad To Sharai! Bun na kine ki kot lah ban pule ne sngap lyngba ka online ne download ïa ki ha ka MP3, PDF, ne EPUB format. Phi lah ruh ban print katto katne sla ban ïasam bad ki briew kiba kwah ban tip ha ka ktien jong ki! Don ruh ki video ba pyni da ki dak. Phi lah ruh ban download ïa ki jingpule Baibl ba la pynwandur ha ki rukom drama, ki drama na Baibl bad ki jingrwai ba sngewtynnad ban sngap ha ki por ba phi shongkai.

Ka jingtip bashisha shaphang ki Nongsakhi U Jehobah. La buh ruh ïa ki khubor ba dang shen bad ki video shaphang ki jingtreikam jong ngi ha satlak ka pyrthei, ki jingjia ba ktah ïa ki Nongsakhi U Jehobah, bad ki jingtrei ban ïarap ïa kiwei kiba don ha ka lanot. Phi lah ban ïoh jingtip shaphang ki jingïaseng heh ban wan bad shaphang ki tnad treikam jong ngi.

Lyngba kine ki jingpyndonkam, ngi pynshai ïa ka jingshai jong ka jingshisha shaduh kaba kut jong ka pyrthei. Ki briew na baroh ki jaka, ba kynthup ruh ïa ka Antarctica ki ïoh jingmyntoi. Ngi duwai ba ‘ka ktien U Jehobah kan ioh iaid stet’ ha satlak ka pyrthei, ban ai burom ïa U Blei.​—2 Thessaloni 3:1.

• Kumno ka jw.org ka ïarap ïa ki briew ban tip ïa ka jingshisha jong ka Baibl?

• Kaei kaba phi kwah ban wad na ka website jong ngi?