Jesus Kristus okwa li a lombwela ovashikuli vaye a ti: ‘Ouyelele weni nau minikile moipafi yovanhu, va mone oilonga yeni iwa nova hambelele Xo yeni meulu.’ (Mateus 5:16) Omolwefinamhango olo, ohatu longifa oinima yoshinanena, mwa kwatelwa ointaneta, opo ouyelele wetu u minikile. Onhele yetu yokointaneta (o-Web Site) www.pr418.com/kj oi li odjo yetu yopambelewa yomauyelele e na sha neitavelo nosho yo oilonga yetu tu li Eendombwedi daJehova. Ouyelele wokondadalunde ulipi tau hangwa ko?

Oku na omanyamukulo opaMbibeli omapulo oo haa pulwa luhapu. Oto dulu okuhanga ko omanyamukulo omapulo amwe a fimanenena oo ovanhu hava pula. Omanyamukulo omuo ahamano okwa nyamukulwa mokafo kedina Mbela owa hala okushiiva oshili? oko taka hangwa kointaneta momalaka 400 lwaapo. Oto dulu yo okuhanga ko Ombibeli yo-New World Translation momalaka mahapu nosho yo omambo mahapu okukonakona Ombibeli, mwa kwatelwa embo Ombibeli otai hongo lela shike? nosho yo oifo yOshungonangelo no-Awake! oyo opo ya piti. Ihapu yomoishangomwa oyo otai dulu okuleshwa ile okupwilikinwa kointaneta ile okutapwa ko molupe lomawi (audio), molupe loshishangomwa ngeenge sha nyanyangidwa (PDF) ile molupe loishangomwa yopaelektronika (EPUB). Oto dulu nokuli okupilinda omapandja onhumba opo u pe umwe oo e na ohokwe a leshe melaka laye. Oku na yo oishangomwa yomalaka okuudika e lili noku lili, i li mouvidio. Oto dulu yo okutapa ko elesho lOmbibeli, oinyandwa ye likolelela kOmbibeli nosho yo eemusika diwa odo to dulu okupwilikina ngeenge to tulumukwa.

Oku na omauyelele e li paushili e na sha nEendombwedi daJehova. Ohaku tulwa yo eenghundana di li pefimbo nouvidio vaxupi ve na sha noilonga yetu yokuudifa yomounyuni aushe, oiningwanima oyo ye tu kuma nosho yo oilonga yetu yokukwafela ngeenge pa holoka oiponga. Oto dulu yo okuhanga ko ouyelele u na sha noyoongalele oyo tai ka ningwa nosho yo eendjukifi doitaimbelewa yetu.

Ouyelele wetu woshili otau minikile okupitila mointaneta fiyo okominghulo dounyuni. Ovanhu momanenedu aeshe, mwa kwatelwa ovo ve li kenenedu olo hali ifanwa Antarctica, olo li li kokulekule noli na outalala wamatutu, otava mono ouwa omolwouyelele oo. Ohatu ilikana opo “ondjovo yOmwene [“Jehova,” NW] i tondoke” nedu alishe opo edina laye li fimanekifwe. — 2 Ovatessaloniki 3:1.

• Onhele yetu yokointaneta www.pr418.com/kj/ otai kwafele ngahelipi ovanhu vahapu ve lihonge oshili yOmbibeli?

• Ouyelele ulipi wa hala oku ka konga konhele yetu yokointaneta?