ယ့ၣ်ၡူး​စံးတ့ၢ် အပျဲၢ်​အဘီၣ်​တဖၣ်​လၢ “သု​တၢ်ကပီၤ​န့ၣ် ဒုး​ကပီၤ​ထီၣ်​အီၤ​လၢ ပှၤကညီ​အမဲာ်​ညါ​ဒ်သိး အ​က​ထံၣ်ဘၣ်​သု​မၤ​တၢ်ဂ့ၤ, ဒီး​က​စံးထီၣ်​ပတြၢၤ သု​ပၢ်​အိၣ်​လၢ​မူခိၣ်​န့ၣ်​တက့ၢ်” လီၤ. (မးသဲ ၅:၁၆) ပ​က​မၤ​ဒ်အံၤ​အဂီၢ်, ပ​သူ​စဲးဖီကဟၣ်​လၢ​စိၤ​ခဲအံၤ ပၣ်ဃုာ် ဒီး​အ့ထၢၣ်နဲး​လီၤ. ပ​ပှာ်ယဲၤသန့ jw.org န့ၣ်​ပာ်ဖျါ​ထီၣ်ဝဲ တၢ်ဂ့ၢ်​ဘၣ်ဃး​ဒီး ယဟိဝၤ​ပှၤအုၣ်​အသး​တဖၣ် အ​တၢ်နာ်​ဒီး​အ​တၢ်ဖံး​တၢ်မၤ​လီၤ. ဖဲ​န့ၣ်​န့ၣ် န​က​ထံၣ်ဘၣ်​တၢ်မနုၤ​လဲၣ်.

လံာ်စီဆှံ​ပာ်ဖျါ​ထီၣ် တၢ်​သံကွၢ်​လၢ ညီနုၢ်​ပှၤသံ​ကွၢ်​တဖၣ် အ​တၢ်​စံးဆၢ. န​က​ထံၣ်ဘၣ်​တၢ်​သံကွၢ်​လၢ အရ့ဒိၣ်​ကတၢၢ်​တဖၣ်​အကျါ​တနီၤ အ​တၢ်​စံးဆၢ​န့ၣ်​လီၤ. အဒိ လံာ်ဖိ​ခံဘ့ၣ်​လၢ​အမ့ၢ် တၢ်နး​တၢ်ဖှီၣ် က​ဟါမၢ်ကွံာ်​တဘျီဘျီ​ဧါ ဒီး​ပှၤသံတ့ၢ်​တဖၣ်​န့ၣ် က​သမူထီၣ်​က့ၤ​ဒံး​ဧါ န့ၣ်​အိၣ်ဝဲ​လၢ online အ​ပူၤ​လၢ​ကျိာ် ၆၀၀ ဘျဲၣ်​န့ၣ်​လီၤ. ဒီး​န​က​ထံၣ်ဘၣ် ဟီၣ်ခိၣ်​သီ​တၢ်​ကွဲးကျိာ်ထံ​လံာ်စီဆှံ လၢ​ကျိာ် ၁၃၀ ဘျဲၣ်​န့ၣ်​လီၤ. ဒီး​န​က​ထံၣ်ဘၣ်​စ့ၢ်ကီး လံာ်​အဂုၤ​အဂၤ​လၢ အ​ကဲထီၣ်​တၢ်မၤစၢၤ​လၢ တၢ်​မၤလိ​လံာ်စီဆှံ​အဂီၢ်​အါမး​ဒ်သိး​ဒီး လံာ်စီဆှံ​သိၣ်လိ​တၢ် နီၢ်နီၢ်​မ့ၢ်​မနုၤ​လဲၣ် ဒီး တၢးထီခိးတၢ် ဒီး​ပၢၢ်ထီၣ် (Awake!) မဲးကစံ​လၢ ဘၣ်​တၢ်​ထုးထီၣ်​အီၤ​အသီ တဖၣ်​န့ၣ်​လီၤ. လံာ်​သ့ၣ်​တဖၣ်​အံၤန့ၣ် န​ဖး​အီၤ, ဒိကနၣ်​အီၤ​လၢ online အ​ပူၤ မ့တမ့ၢ် န​ဒီလိး​အီၤ​လၢ MP3, PDF ဒီး EPUB အ​ပူၤ​သ့​စ့ၢ်ကီး​လီၤ. န​ထုးထီၣ် လံာ်​ကဘျံး​စှၤဘ့ၣ် လၢ​န​က​နီၤလီၤ​ဆူ ပှၤလၢ​အသး​စဲ​တၢ်​တဂၤ​လၢ အ​နီၢ်ကစၢ်​အကျိာ်​သ့​လီၤ. လံာ်လဲၢ်​လၢ​ပ​ထုးထီၣ်​အီၤ​တနီၤ ဘၣ်​တၢ်​ပာ်ဖျါ​က့ၤ​အီၤ​လၢ စုပနီၣ်​ကျိာ်​အ​ကလုာ်​ကလုာ်​လၢ တၢ်ဂီၤမူ​လီၤ. ဖဲ​န​ချုး​အဆၢ​ကတီၢ်​န့ၣ် န​မ့ၢ်​အဲၣ်ဒိး​ဒိကနၣ် တၢ်ဖး​လံာ်စီဆှံ​ဒ်​တၢ်ဂဲၤဒိပူ​နီၢ်နီၢ်​အသိး, လံာ်စီဆှံ​တၢ်ဂဲၤဒိပူ​တဖၣ် ဒီး​တၢ်ဒ့တၢ်အူ​လၢ​အမုာ်​န့ၣ် န​ဒီလိး (download) အီၤ​လၢ​ပ​ပှာ်ယဲၤသန့​အ​ပူၤ သ့​လီၤ.

တၢ်ဂ့ၢ်​လၢ​ဘၣ်ဃး​ဒီး ယဟိဝၤ​ပှၤအုၣ်​အသး​တဖၣ်. တၢ်ဂ့ၢ်​အဂၤ​တဖၣ်​လၢ​ပ​ပာ်ထီၣ်​အီၤ​လၢ အ့ထၢၣ်နဲး​အ​ပူၤ​န့ၣ်​မ့ၢ်ဝဲဒၣ် တၢ်ကစီၣ်​အသီ​ဒီး တၢ်ဂီၤမူ​အဖုၣ်​တဖၣ်​လၢ​ဘၣ်ဃး​ဒီး ပ​တၢ်ဖံး​တၢ်မၤ​လၢ​ဟီၣ်ခိၣ်​ဒီဘ့ၣ်, တၢ်မၤ​အသး​လၢ​ဘၣ်ဃး​ဒီး ယဟိဝၤ​ပှၤအုၣ်​အသး​တဖၣ်​ဒီး ပ​မၤစၢၤ​ပှၤလၢ အ​ဘၣ်ကီ​ဘၣ်ခဲ​တဖၣ်​ဒ်လဲၣ် အဂ့ၢ်​န့ၣ်​လီၤ. န​က​ထံၣ်ဘၣ်​စ့ၢ်ကီး တၢ်​အိၣ်ဖှိၣ်​ဖးဒိၣ်​အ​တၢ်ရဲၣ်​တၢ်ကျဲၤ​လၢ က​ဘၣ်​တၢ်မၤ​အီၤ​ဆူညါ​တဖၣ် ဒီး​တၢ်ဂ့ၢ်​ဘၣ်ဃး​ဒီး​ပဝဲၤတြၢ်တဖၣ် ဒ်သိး​န​ဆဲးကျိး​ဒီး​ပှၤ က​သ့​အဂီၢ်​န့ၣ်​လီၤ.

ပ​ပှာ်ယဲၤသန့​အံၤ ကဲထီၣ်​တၢ်မၤစၢၤ​လၢ ပ​က​မၤ​ကပီၤ​တၢ်မ့ၢ်​တၢ်တီ အ​တၢ်ကပီၤ​ဆူ တၢ်လီၢ်​လၢ​အယံၤ​ကတၢၢ်​ဒၣ်လဲာ်​န့ၣ်​လီၤ. ပှၤကညီ​လၢ​ကီၢ်​မိၢ်ပှၢ်​ခဲလၢာ်, ဃုာ်ဒီး​ပှၤလၢ​အ​အိၣ်​လၢ အၣ်​ထၣ်​တံ​ကၣ်​တဖၣ်​န့ၣ် ဒိးန့ၢ်​ဘၣ်​တၢ်​အဘျုး​စ့ၢ်ကီး​လီၤ. ပ​ဃ့​ဘါ​ထုကဖၣ်​လၢ “ယွၤ​အ​ကလုၢ်​ကထါ​က​ဃ့ၢ်” လၢ​ဟီၣ်ခိၣ်​ဒီဘ့ၣ်, ဒ်သိး​ယွၤ​အလၤကပီၤ ကအိၣ်​ဖျါထီၣ်​အဂီၢ်​န့ၣ်​လီၤ.—၂ သ့းစၤလနံ ၃:၁.

• ပှၤ​အါဂၤ​က​သ့ၣ်ညါ​ထီၣ် လံာ်စီဆှံ​တၢ်မ့ၢ်​တၢ်တီ​အဂီၢ် jw.org မၤစၢၤဝဲ​သ့​ဒ်လဲၣ်.

• မ့ၢ်​န​အဲၣ်ဒိး​ဃု​သ့ၣ်ညါ တၢ်မနုၤ​လၢ ပ​ပှာ်ယဲၤသန့ အ​ပူၤ​လဲၣ်.