Yesu Klisto tubilaka banlonguki na yandi ti: “Mwinda na beno fweti pela na meso ya bantu. Mpidina bo tamona mambu ya mbote ya beno kesalaka ebuna bo ta pesa lukumu na Tata na beno kele na zulu.” (Matayo 5:16) Yau yina beto kena kusadila mbote mayele mutindu na mitindu ya bilumbu yayi, yavuanda mpe Internet. Site jw.org kele site officiel ya Bambangi ya Yehova, kisika nge lenda mona mambu yina bau kendimaka mpe bisalu na bau. Yinki mambu nge kekuta na site yango?

Nge kekuta bamvutu ya Biblia samu na biuvu yina keyuvusamaka mingi. Nge lenda baka bamvutu samu na biuvu ya mfunu mingi yina bantu keyuvusaka. Na kifuani, ba tracts neti kilumbu kele bampasi kemanisa to Bantu ya kufua balenda mpenza kuzinga diaka? kele na site na bandinga kuluta 600. Nge lenda mona diaka Mbalula ya Nsi-Ntoto ya Mpa na ba ndinga kuluta 130, mpe mikanda nkaka yina ketubilaka Biblia. Yalenda vuanda mukanda Yinki Biblia kelongaka Beto? Mpe bazulunalo Nkengidi na Lamuka! yina mebima bosi. Nge lenda tanga mingi ya mikanda yango to kuwa yau na Internet, to nge lenda bimisa yau na mutindu yina mezabana lokola MP3, PDF to EPUB. Nge lenda kutu kubimisa masolo yankaka na papye samu nge pesa muntu na ndinga na yandi! Yakele na mikanda yankaka yina bametula na video na bandinga ya mutindu na mutindu ya mababa. Nge lenda baka badrame ya kutanga Biblia to yankaka, mpe miziki ya kitoko yina nge lenda kuwa na ntangu yina nge mezola.

Nge kekuta diaka mambu yankaka yina metadila Bambangi ya Yehova. Nge kekuta kuna bansangu ya yimpa mpe bavideo yina metala kisalu ya beto na yinza ya mvimba, mpe mambu yina mekumina Bambangi ya Yehova, mpe lusadusu yina beto pesaka bampangi yina bisumbula mebuila. Nge lenda baka diaka bansangu yina metadila balukutakanu ya beto yina kena kuiza, mpe baadresi na banimero ya telefone ya babiro ya bafiliale.

Nionso yina kena kusadisa beto beto pedisa kedika ya Biblia tii na nsuka ya ntoto. Yau kena sadisa bantu ya bayinsi nionso, yavuanda na babuala ya madidi ya ngolo lokola Antarctique. Beto kena kusambila ti Mpova ya Yehova ‘yamwangana kaka nswalu-nswalu’ na yinza ya mvimba, samu na nkembo ya Nzambi.​—2 Batesalonika 3:1.

• Yinki mutindu site officiel ya beto jw.org kena sadisa bantu mingi kuluta balonguka kedika ya Biblia?

• Yinki mambu nge kesepela kusosa na site ya beto ya Internet?