Yesu Klistu wakalwiita bashikwiiya bakwe ayi: “Mbweeke ubo amwebo amuboneshe mumuni wanu kubantu, kwaamba ayi babone milimo yanu ibotu, akupa bulemu kuli Ishiwanu wa kwiculu.” (Mateyo 5:16) Kwaamba ayi tucite boobo, tulasebensesha shakupangapanga sha munshiku shino mbuli intaneti. Tulabika makani pa Intaneti kusebensesha Webu Saiti Yesu yakasuminishikwa ya www.pr418.com yaamba sha makani Bakamboni Bakwe Yehova ngobashoma anciito yabo. Ino palacanikanshi?

Shikumbulo shamu Baibo kumiipusho bantu liinji njobeepusha. Inga mwacana shikumbulo kumiipusho iyandika abuumbi bantu njobepusha. Kucakubonenaako, matilakiti mbuli Ino kupenga kulaakumana? alimwi a Sa bafu ncancinecine balaakubuka? alacanika pa webusaiti iyi mumishobo iinda ku 600. Pali a Baibo ya New World Translation mumishobo iinda ku 130 alimwi amabuku acafwa kwiiya Baibo, mbuli Ino Baibo Ilaiisha Nshi? alimwi amagazini a Njashi Yamulindilishi a Sinsimuka! Inga mwabelenga na kukutika kumabuku akalekodwa ngeenga mwapulinta na kucita daunilodi mu MP3, PDF, na EPUB kwaamba ayi munookutika. Na kamusuni inga mwapulintilaako bamwi beenga basuna kubelenga makani ayo mumushobo wabo! Palaba amavidyo aanji mumishobo iinji yabaabo bashinkite matwi. Inga mwacita daunilodi shisekano shamu Baibo shakukutikabo, Shisekano shamu Baibo shakweebela, alimwi anyiimbo shibotu nsheenga kamukutika ndyemutokookesha.

Makani ancine aamba sha Bakamboni Bakwe Yehova. Palabikwa amakani apya atumavidyo tufwiifwi tutondesha incito yesu nsengwe yoonse, shakucitika shitokuma Bakamboni Bakwe Yehova, alimwi a mbotucafwa bamwi na bapolelwa mapensho. Inga mwacana amakani atondesha ndyekuba kubungana kunene alimwi amakani atondesha nkweenga mwacana maofesi amusampi.

Kwiinda mukusebensesha nshila iyi, tulamunika mumuni walushinisho kumisena yoonse yapacishi. Bantu beshikuswa mumbasu shoonse sha cishi kubikawo abaabo baswa kulaale mbuli kuAntarctica, balacafwikwa. Mupailo wesu ngwakwaamba ayi ‘Maswi akwe Yehova amwaike cakufwambaana’ pacishi coonse kwaamba ayi bantu bape bulemu Yehova.—2 Bene Tesalonika 3:1.

• Ino makani acanika paWebu Saiti ya www.pr418.com alacafwa buyani bantu kwiiya cancine camu Baibo?

• Ino ngamakani nshi ngweenga mwasuna kulangoola paWebu Saiti yesu?