E Jesús go xipji kʼo o discípulo: “Ri juɇsigeji a jmii yo ntee, ngekʼua ra nuji kʼꞹ in kjageji na joo, ñeje ra matrʼꞹji Mizhokjimi kʼꞹ bʼꞹbʼꞹ ajensʼe” (Mateo 5:16, NTD). Pa ra kjagojme kʼo go mama e Jesús ro kuatrʼꞹjme na página kja Internet. Ngextrjo kja www.jw.org mama pje ri kjagojme ñe pje ri kreojme yo ri testigojme e Jehová. ¿Pje ri pɇsʼigojmenu?

Ri chøtrʼꞹgenu yo trʼønꞹ kʼo kjaji yo ntee ja ga kjaa kʼo mama ne Biblia. Nzakja kʼe tsʼixiskuama kʼe ni chju̱u̱ ¿Ra sⱥjⱥ nu paa ma dya kja ra supjreji? ñe kʼe tsʼixiskuama kʼꞹ ni chju̱u̱ ¿Kjo ra mimiji na yeje yo ya nrru̱u̱? Kja kʼe sitio nu ri pɇskʼøjme kja Internet ri chøtrʼꞹ kʼo tsʼixiskuama. Ixi kjogꞹ seiscientos idioma kʼꞹ ri opjꞹjme kʼo tsʼixiskuama. Xo ri chøtrʼꞹgenu ne Biblia Traducción del Nuevo Mundo ixi kjogꞹ ciento treinta idioma, xo ri chøtrʼꞹge skuama kʼo ri jichigojme yo ntee kʼo mama o Jñaa e Mizhokjimi, nzakja kʼe skuama ¿Qué enseña realmente la Biblia?, yo skuama La Atalaya ñe ¡Despertad! kʼo kja dʼadyo. Yo skuamayo søø ri dyⱥrⱥ, xo søø ri pjongꞹge kja MP3, PDF o EPUB ngekʼua ri søø ri jñanrra kja computadora. Mꞹ bʼꞹbʼꞹ na ntee ke nee ra xørꞹ yo skuama, søø ri pjongꞹge copia ngekʼua ri unꞹge. Xo ri chøtrʼꞹgenu video kja na punkjꞹ lenguaje de señas. Mꞹ gi nee, søø ri pjongꞹgenu kʼo ri dyⱥrⱥ kʼo mama ne Biblia ñe drama kʼꞹ ra mbøxkʼꞹ ri tsjage kʼo nee e Mizhokjimi. Xo ri chøtrʼꞹgenu bʼizhi kʼꞹ ri dyⱥrⱥ ma ri soya.

Ri chøtrʼꞹgenu pje ri kjagojme yo ri testigojme e Jehová. Kja in sitiogojme kja Internet ri chøtrʼꞹge pje kjogꞹzgojme, ja ga kjagojme in bʼɇpjigojme kja nrrexe nu Xoñijomꞹ ñe ja ga pjøsʼꞹjme in dyokjojme. Xo ri xørꞹgekʼo, o søø ri jñanrragekʼo kja na video. Søø ri chøtrʼꞹgenu jingua ra jmurgojme kja asamblea ñe pje ri tsjage ma gi nee ri zopjꞹ kja sucursal ja pɇpjiji yo testigo e Jehová.

Ri kjagojme in bʼɇpjigojme ngekʼua ra pjøsʼꞹjme yo ntee ra mba̱ra̱ji e Mizhokjimi kja nrrexe ne Xoñijomꞹ, zo me na je̱e̱ ja bʼꞹnji nzakja kʼo ka̱ra̱ kja kʼe continente ke ni chju̱u̱ Antártida. Me ri øtꞹjme Mizhokjimi Jehová sido ra mbøxkꞹgojme ngekʼua “ra zopjꞹjme na punkjꞹ [...] ntee ra xipjijme o jñaa Mizhokjimi” ngekʼua ra mba̱ra̱ji kjo nge angeze (2 Tesalonicenses 3:1).

• ¿Ja ga pjøsʼꞹjme yo ntee kja www.jw.org ngekʼua ra mba̱ra̱ji Mizhokjimi?

• ¿Pje ri chøtrʼꞹge kja in sitiogojme kja Internet?