Jesũ eerĩre athingati baawe atĩrĩ: “Tumageni weru bwenu buthaarira antu, nikenda boona ati mathithio jenu ni jamega, bakumie Abagu wenu uria uri Iguru.” (Mathayo 5:16) Ĩgiitene rĩrĩ, nĩtũgũtumĩra bwega tekinolojĩ ya kĩnandĩ, o amwe na Intaneti. Webusaĩti yeetũ, jw.org, nĩyo gĩtuo gĩetũ kĩongwa kĩrĩ Intaneti, ĩrĩa ĩrĩ na mantũ jegiĩ wĩtĩkio bwetũ na ngũgĩ cia Akũũjĩ ba Jehova. Nĩ mantũ jarĩkũ ĩthagĩrwa najo?

Macookio ja biũria bia Bibiria birĩa biũragua na wingĩ. No woone macookio ja biũria bimwe bia bata mono birĩa antũ booragia. Ngerekano trakti, Mĩthangĩko Rĩ, Kũrĩ Rĩo Ĩkathira? na Barĩa Bakuĩte Rĩ, Bagatũũra Kaĩrĩ? nĩcionekaga na mĩgambo nkũrũki ya 600 intanetine. Kinya no woone Tafsiri ya Ulimwengu Mpya kĩrĩ mĩgambo nkũrũki ya 130 na maukũ jangĩ jamaingĩ ja gũgũteethia kwiritana Bibiria, jau nĩ amwe na iuku, Jaria Bibiria Yuumba Guturitana? na ngacĩti irĩa ciumĩrĩte rua cia Mnara wa Mlinzi na Amkeni! Jamaingĩ ja mauku jau no jathoomwe kana ũkajathikĩĩra jakĩthoomwa kĩrĩ intaneti kana ũkajarita jarĩ mũthemba jwa MP3, PDF, kana EPUB. Kinya no ũcabithie tũrataci twa kweejana, na mũgambo jwa antũ barĩa bagũkucĩĩrua! Kũrĩ na mauku jathithĩtue na njĩra ya vidio cia mĩgambo ya mathithio. No ũrite kĩrĩ intaneti ũthoomi bwa Bibiria bũthoometwe na njĩra ya drama, drama cia Bibiria, na ndwĩmbo inthongi cia kũgwĩrĩrua rĩrĩa uurũki.

Mantũ ja mma jegiĩ Akũũjĩ ba Jehova. Kinya kũrĩ na mantũ jarĩa jaumĩrĩte rua na tũcuncĩ twa vidio twegiĩ ngũgĩ yeetũ ya nthĩgũrũne yonthe, mantũ jarĩa jakũringithia Akũũjĩ ba Jehova na ngũgĩ yeetũ ya gũteetheria magiita ja ũgwati. No woone imenyithia bia igomano birĩa biĩjĩte na namba cia kwaranĩria na obici cietũ cia rwang’i.

Gũkũrũkĩĩra njĩra iu, nĩ tũkũthaaria werũ bwa ũmma kĩrĩ icigo bia kũraaja buru bia nthĩgũrũ. Antũ kuuma nteere cionthe cia nthĩgũrũ, o na kinya ba nteere cia Antarctica, nĩ bakũgunĩka. Nĩtũkũromba atĩ “ruteto rwa Murungu rugite mpwi” cia gũtũmĩĩrua nthĩgũrũne yonthe, nĩũntũ bwa gũkumithia Jehova.—2 Athesalonike 3:1.

• Nĩatĩa webusaĩti ya jw.org ĩgũteetheria antũ babaingĩ kwiritana ũmma bwa Bibiria?

• Nĩ ũntũ bũrĩkũ ũrĩngĩenda gũtega kĩrĩ webusaitĩ yeetũ?