Yesu Kristu ahowiirela eetthucyaawe co: “Nwoonihere apinaatamu meettelweenyu omaana, wiira yoone miteko cinyu comaana ni wiira anttitthimihe Paapeenyu ri wiirimu.” (Matewus 5:16) Wiira yiirannye iyo, ninaavarela nteko saana itekonologia yo mahukwaala, toko interneti. Isayitiihu, jw.org, phi nipuro ntthu nimphwanyaawe coohimiya co Masaahiti a Yehova toko citthu cinkupalyaaya ni miteko caya. Isiyani imphwanyannya nhina ila isayitiila?

Maakhulelo o Ibiiblya wo makoho ampankaaya atthu enci. Nyuuva nnaahala uphwanya waakhuliya wo makoho makhwaawe moolupale. Wootakihera, ifolyetu Uhuva unaarwa umala wanihukuni? ni Atthu ookhwa anaarwa uhokoleela ukhala akumi? cinaaphwanyannya nsayitini wihu ni iluuka coopwahaka 700. Ciicammo pooti usoma Ibiibliya Tradução do Novo Mundo ni iluuka coopwahaka 150, ni ilivuru cikhwaawe cinkavihera wiiweeha Ibiiblya, toko ilivuru O Que Nos Ensina a Bíblia? ni irevista Ukhalenla ni Despertai! cikumiheriye naanaano. Irevista cinci pooti uviriyaniya awula usomiya mwinternetini awula pooti ubaxari ni inanna cinci cootepa ucuweliya toko MP3, PDF ni EPUB. Hataa pooti wimpirimiri ipaagina cimpheeleenyu co ilivuru co iluuka cikhwaawe, wiira munvahe ntthu nohala upheela usoma. Ciicammo cihaavo ividiyu cinci co iluuka yaatthu ahinuuluma ni ahiniiwa. Nyuuva ciicammo pooti ubaxari coosomiya combiiblyani ninhapo, ifilme ni macipo omaana wiira nviriyane ukati woohalaka wuucivelani.

Coohimiya ceekhweeli co Masaahiti a Yehova. Ciicammo cinaakumiheriyaka ihapari co naanaano ni ividiyu cinooluma nteko ninvareehu ntuninyani motheene, citthu cinwiirannyeela Masaahiti a Yehova ni cinhimya inanna nineekurumiceehu ukavihera yakhumelelaka ihasara. Nyuuva ciicammo pooti uphwanya mahimyo o mahuku anhala upankiya ikonkreesu ni citthu cikiina co Peteli.

Ala phi mananna ampankeehu wiira imwaryeele ikhweeli yo mbiiblyani mpaka wuumaleloni ituninya. Atthu o ilapo yotheene mpaka ale ankhala ilapo yo Antártida, aneera yakaviheriyaka. Ninaalompa wiira “nuulumo na Yehova nihihiyerere umwaryeela wowaakuvya” nlaponi motheene wiira attitthimihiye Nluku.—2 Atesalonika 3:1.

• Manannani isayitiihu jw.org inaakaviheraaya atthu ucuwela ikhweeli co mbiiblyani?

• Isiyani yuucivenleni usoma awula uviriyana nsayitini wihu?