Иисус шке тунемшыж-влаклан тыге каласен: «Тек тендан волгыдыдат еҥ-влак ончылно тыгак волгалтара. Тек нуно поро пашадам ужыт да Пылпомышсо Ачадам чапландарат» (Матфейын 5:16). Тидым ышташ манын, ме тачысе технологий ден интернетым кучылтына. Мемнан jw.org сайтна Иегован Таныкше-влакын туныктымашышт да ыштыме пашашт нерген пален налаш полша. Мом тушто муаш лиеш?

Кӱлешан йодыш-влаклан Библий гыч вашмутым. Сайтыштына шуко тургыжландарыше йодышлан вашмутым муыда. Мутлан, тушто тыгай буклет-влак улыт: «Ончыкылык илышым могайым те ужыда?» да «Еш пиаллан мо эн кӱлешан?». Нине буклетым 900 утла йылмыш кусарыме. Тыгак тушто Библийын «У тӱнян кусарымашыжым» муаш лиеш. Тудым 160 утла йылмыш кусарыме. А эше Библийым шымлаш полшышо пособий-влак дене тылзе еда лекше «Орол башне» да «Помыжалтса!» журнална-влакым туштак лудаш лиеш. Шуко материалым сайтыштак лудаш да колышташ лиеш. Але тудым MP3, PDF да EPUB семын электронный ӱзгарыш кусарен кертыда. Шымлыше айдемылан шочмо йылмыж дене возымо оҥай статьям печатлен луктын кертыда! Тӱрлӧ жест йылме дене видеоматериалым ончаш лиеш. Тыгак туштак Библийым сылнын лудмашым, библийысе фильм-влакым да мотор мурсемым тулен налаш лиеш.

Иегован Таныкше-влак нерген чын информацийым. Сайтыштына тӱрлӧ эллаште ыштыме пашана нерген пытартыш уверым да видеоролик-влакым верландарат. Иктаж-могай эҥгек лийме годым кузе ме икте-весылан полшена туштак пален налаш лиеш. Лийшаш конгресс-влак нерген да тыгак мемнан филиална-влакын адресыштым палнеда гын, информацийым тиде сайтыштак муын кертыда.

У технологий полыш дене чынын волгыдыжо эн тора вер марте шуын, эсогыл Антарктиде мартеат. Калыклан Библий гыч чыным пален налаш йӧн лектын. Иегован шомакше уло мланде мучко «писын шарлыже да чапланыже манын» кумалына (2 Фессалоникысе-влаклан 3:1).

• jw.org сайт Библий гыч чыным пален налаш калыклан кузе полша?

• Мемнан сайтнам кучылтын, мом пален налаш тендан кумылда уло?