E Yesu Klistu wanenile awasambilizi wakwe ukuti: “Lekani uluswepo lwinu luwalile ku wantu, pa kuti walole imilimo yinu imizima nu kucindika Umukwasi winu uwa mwi yulu.” (Mateyu 5:16) Pa kucita wo-o, tukawomvya ivintu vino awantu wakupanga, ukuwikako ne intaneti. Acino swe Nte zya kwe Yehova tukawika ivyewo pa intaneti yitu iya jw.org vino vikalanda pe vino twazumilamo nga ni milimo yitu. Nga vinji vino vikawapo avyewo ci?

Pakawa ivyasuko vya mu Baibolo ku mawuzyo yano awavule wakakolowozyapo. Pe webusaiti yitu mulizanapo ni vyasuko ku mawuzyo yano awantu awavule wakakolowozyapo sana. Ku cakulolelako, pawa amatrakiti yakuti Uzye Uwuyimvi Wulitela Wusile? ni yakuti Uzye Awafwe Walizyulupuka? Yawa pa intaneti mu ndimi ukucila 600. Pa webusaiti yitu pawa ne Baibolo ya Amalembo ya Calo Cipya mu ndimi ukucila 130 na mabuku yanji yano yakatwavwa ukusambilila Baibolo amakole ibuku lyakuti Bushe Cinshi Baibolo Isambilisha? nga pawa na Ulupungu lwa kwa Kalinda ne Loleni! ivya nombanye. Nga mukulonda mungawazya nanti ukukopolola ivyewo vya kuteyelezyako mu musango wuno wakati MP3, swinya mungakopolola ni vyewo vya kuwazya mu musango wuno wakati PDF, nanti mu musango wa EPUB. Nga mukulonda mungapulinta nu kupako wano wakulonda vyovyo ivyewo mu citundu cino wamanya! Swinya pakawa na mabuku ya pa mavidyo mu ndimi imvule izya ciwulu. Mungakopolola indwimbo izizima sana nanti ukukopolola amazwi nanti amalyasi ya mu Baibolo yano wawazya icete sana icakuti yakakwivwika ngati wasimika vye vino vyacitikanga.

Pakawa na malyasi ya Nte zya kwe Yehova. Mungazanapo na malyasi ya nombanye nu tumavidyo utufupi vino vikulondolola vyo tukuwomba umulimo witu munsi yonsi, ukuwikako ni vintu vinji vino vikuciticila Inte zya kwe Yehova na vino tukakwavwilizya wano wakuponelwa ni ntazi. Wakawikapo amaadresi ya maofesi ya misambo nga na manda ni vifulo vya kulonganilapo ukulongana kwa citungu.

Ukuwika vyo-o ivyewo pa intaneti kukalenga twakwavwilizya awantu munsi izilekanelekane ukumanya icisinka. Awantu awavule na wano wawela munsi izya kutali sana ukuwikako na wa munsi zino zyatalala nkaninye izikole ku Antarctica na wonye wakasambililako. Acino tukupepa ukuti ‘izwi lya kwe Leza lyasalangana zuwa zuwa’ munsi yonsinye pa kuti awantu wacindika Leza.—2 Watesalonika 3:1.

• Uzye ivyewo vino vikawa pa jw.org vikakwavwa wuli awantu awavule ukusambilila Baibolo?

• Avyewo ci vino vyawa pa webusaiti yitu vino mungakunda ukumanya?