Jesub Xristub ge ǁîb di saosabena ge mîba: “ǁNati ǃnâb ado khoen aiǃâ ǃnâǃnâ, în sadu ǃgâi sîsenga mû, în sadu Îb ǀhomgu ǃnâ hâba ǂkhaiǂkhai.” (Mateub 5:16) ǁNās kōse da ge ǃgâiǂhôasa ra aoǁnâ, nētsē ra sîsenūhe internets tsîna da ra sîsenūs kōse. Sida soab internets aib ge jw.org, ǂhanu soab ǃnāsa ǃgāsasibats a hōǁkhā Jehovab di ǀHûǀguitimî-aon xa tsî ǁîn ǂgoms tsî sîsen ǀgaub xa. Tae-e ǃkhōǂgā hâ?

Elobmîs ge hoaǃnâ-aixase ra dîhe dîde ra ǃeream. ǃEreamtets ge a hōǁkhā kaise ǃnāsasen khoena ra dî dîdi ǃereamdi ai. Aiǁgause sao ra ǂhawero kha ǃGomsiga huga toa i nî? tsî ǁŌhâna ǁkhapan amabes ǃnâ nî ûi ǁkhā? Di hâ kha ge 600 gowagu ǃnâ a hōhe ǁkhā internets ai. Sats tsîn ge New World Translation di ǀon hâ Elobmîsa 130 gowagu ǃnâ a hōǁkhā. Elobmîsa tae-e a ǁkhāǁkhā da ǁkhā? di hâ ǂkhanis tsî Watchtower and Awake! di hâ ǂkhanigu tsîna a hōǁkhā. ǂGui ǂkhanin nēn xan ge internets sa xu ǃnaoǁnâhe tamas ka io ǁîs ai ǃgâhe ǁkhā, MP3, PDF tamas ka io EPUB ǀgaub ai. ǂHâbats ga o, ots ge ǁgâiǁnâs tsîna a dī ǁkhā tsî ǃgâ ǂgao ra khoen ǀkha nē xūn xa a ǁgam ǁkhā sa gowab ǃnâ! ǃGomekhoen gowab ǃnâ ǂnûiǃkhunisa vidiob ge a hōhe ǁkhā. ǀHuruǃâs khami Elobmîsa xū khomaihe hâ ǃân tsînats ge a ǃnaoǁnâ ǁkhā, Elobmîs ǀhuruǃâdi, ǁkhoaxa musik amdi sa ǁaeb aits a ǃgâ ǁkhāde.

Jehovab di ǀHûǀguitimî-aon xa hâ amab. Hōǁkhāts a i ge ǀasa ǂhôan, ǃnaoǁnâsa vidiob ǁîn di ǃhūbaib ǂhawa sîsenni, tsî ī ra xūn Jehovab di ǀHûǀguitimî-aona ǃkhōǂgā hân tsî matin da tsūkēǃgâb ǃnâ ge hâ i khoena huiǂuihe ǀgaub tsîn ge a mûhe ǁkhā. Hānîǁaeb ǃnâ nî hâ kai ǀhaodi tsēdi tsî mapats ǃnāsa ǃgāsasiba ǁnâugu berodi xa hōǁkhās tsîna.

Nēs ǀkha da ge sida ǃnâb amab diba ra ǃnâ kai kaise ǃnū ǃādi ǃhūbaib ǂhawase hâ di ais tsîna. Hoa khoen ǃhūbaib ǂhawase a hōhe ǁkhān hoan ge ra huihe Antartikab kōse. ǀGore da ge ra is Jehova Elob “mîsa ǃgûba ūhâ” hoa ǃhūbaib ai ǁÎb di koas tsî gares kōse.—2 Tesalonikaǁîn 3:1.

• Matis jw.org sa khoena ra hui Elobmîs amaba ǁkhāǁkhāsensa?

• Tae-ets ǃnāsase ra ǂanǂgao sida internets soab ai?