Yezo pandó hɛ ava lo ya: “Ĩ zia vuru ndo tɛ ĩ asũ ka gbɛlɛ azi zu, wa ala hũ nzɔ̃ kwa tɛ ĩ ko ala gonda to ĩ mɛ ka yayu.” (Matie 5:16, NW) Ni la e ndo li kwa na akɔdɛ ndɛ ndɛ ndɛ mɛ asi na ngoi olo, nga ma Internet. Site tɛ e, jw.org, adu sitɛ tɛ Atɛmwɛ tɛ Yehova, kai la ndo kambisa aye mɛ Atɛmwɛ tɛ Yehova ndo ye nga na akwa tɛ la. Aye mɛ mɔ na tãngɔ ka ya site ni nɛ?

Mɔ na tãngɔ agbinya ti Ngbangɔ na ndo ahũnda mɛ azi ndo hũnda fani sĩni. Mɔ na lwangɔ agbinya ti akota hũnda mɛ azi ndo hũnda. Nga ma ahũnda mana mɛ agbinya tɛnɛ ndoni ka ya traktɛ Pɛnɔ na wɛngɔ mbɛni la kɔi? nga na Awakwáni na diringɔ dungɔ lɛ la ngɛ̃́ fani mɛ ndɛ̃́? Ni dazu na ayanga a ɔ 600. Mɔ na tãngɔ nga Biblia Libongoli ya Mokili ya Sika na ayanga a ɔ 130 nga na aye mɛ ndo za e na mandangɔ ngbangɔ, ka yani buku Ye mɛ Ngbangɔ ndo ha na e nɛ? nga na azuluna Linɔ́ngi ya Mosɛnzɛli na Lamuká! Mɛ asi fanani. Mɔ lengbi ti dingɔ bere mangɔ ambeti niko ka ya Internet, bere mɔ mu nga omɛ ti mungɔ, na afɔrma PDF, bere EPUB. Mɔ lengbi ti singɔ na mbɛni ambeti ni ka ndo lɛ akugbe na yanga kɔi na lo tɛ zo mɛ ndo di yanga niko! Ni nga na avideyo ti ambeti gba na yanga tɛ abubulu ti akɔdɔrɔ ndɛ ndɛ ndɛ dazu. Mɔ lengbi ti mungɔ adramɛ ti Ngbangɔ mɛ adi dingɔ, ateyatrɛ ti Ngbangɔ, nga na anzɔ̃ nzɔ̃ mɔziki mɛ mɔ lengbi ti mangɔ na ngoi mɛ mɔ ye.

Mɔ na tãngɔ alo mɛ ndɛ̃ mɛ aba Atɛmwɛ tɛ Yehova. Mɔ na tãngɔ afana pandɛ nga na avideyo mɛ aba kwa tɛ e ti lɛ gegi zu, nga na alo mɛ asi na Atɛmwɛ tɛ Yehova, nga na se mɛ e ndo za na ayata mɛ atengbi na kpengba lo. Mɔ na tãngɔ apandɛ mɛ aba akota bombi tɛ e mɛ na gangɔ nga na a adrɛsi na animɛro ti telefɔnɛ ti abiro ti filialɛ.

Aye ko zu ndo za e ya esũ na vuru ndo ti bɛta lo tee ka nda sese gbɔɔ. Ni ndo za azi ti lɛ sese zu, mu nga ka ndo mɛ de ndo ya ma wo ma nga ma Antarctique. E ndo sambela ya “tɛnɛ tɛ Yehova adɔ nɔ̃ hiɔ hiɔ” ka lɛ sese zu, na lo ndima tɛ Nzapa.​—2 Tɛsalonikɛ 3:1, NW.

• Site tɛ e jw.org ndo za azi gba ya ala manda bɛta lo ti ngbangɔ ngasia?

• Aye mɛ mɔ ye gingɔ ka ya site ti Internet tɛ e nɛ?