Jesu Kriste o boditše balatedi ba gagwe gore: “Seetša sa lena a se bonege pele ga batho, e le gore ba bone mediro ya lena e mebotse gomme ba nee Tatago lena yo a lego magodimong letago.” (Mateo 5:16) Re phetha seo ka go diriša ka botlalo thekinolotši ya mehleng yeno, go akaretša le Inthanete. Wepesaete ya rena ya jw.org, ke mothopo wa semmušo wa tsebišo ka Dihlatse tša Jehofa le mediro ya tšona. E hupere eng?

Dikarabo tša Beibele tša dipotšišo tše tlwaelegilego. O ka hwetša dikarabo tša dipotšišo tše bohlokwa kudu tšeo batho ba kilego ba di botšiša. Tše tshela tša dipotšišo tšeo di arabja pampišaneng ya Na o ka Rata go Tseba Therešo, yeo e hwetšagalago inthaneteng ka maleme a ka godimo ga a 400. Gape o ka hwetša Phetolelo ya Lefase le Lefsa ka maleme a ka godimo ga a 100 le dikgatišo tše dintši tša go ithuta Beibele, go akaretša le puku ya Ke Eng Seo ge e le Gabotse Beibele e se Rutago? le ditokollo tša morago bjale tša Morokami le Phafoga! Tše dintši tša dikgatišo tše di ka balwa goba tša theetšwa inthaneteng goba tša tšewa di le ka mohuta wa difaele tša go theetšwa, tša PDF goba tša EPUB. O ka ba wa gatiša matlakala a mmalwa gore o a nee motho yo a thabelago ka leleme la gagwe! Dikgatišo tša bidio di hwetšagala ka maleme a mantši a polelo ya diatla. O ka ikopišetša diterama tša mmalo wa Beibele, diterama tša Beibele le mmino o mobose tšeo o ka di bapalago ge o iketlile.

Tsebišo e nepagetšego ka Dihlatse tša Jehofa. Gape go beilwe ditaba tša moragorago le dibidio tše kopana mabapi le modiro wa rena wa lefase ka bophara, ditiragalo tšeo di kgomago Dihlatse tša Jehofa le mediro ya rena ya go hlakodiša batho masetlapelong. O ka hwetša ditsebišo tša dikopano tša nakong e tlago le tsebišo ya kamoo go ka ikgokaganywago le makala a rena.

Ka tsela ye, re dira gore seetša sa therešo se bonege dikarolong tša kgole kudu tša lefase. Go holega batho ba tšwago dikontinenteng ka moka, go akaretša le Antarctica. Re rapelela gore “lentšu la Jehofa le dule le phatlalala ka go akgofa” dikarolong ka moka tša lefase, bakeng sa go tagafatša Modimo.—2 Bathesalonika 3:1.

• Wepesaete ya jw.org/nso e thuša batho ba bantši bjang go ithuta therešo ya Beibele?

• O ka rata go nyakišiša eng Wepesaeteng ya rena?