Jesus Christ bikééʼ naakai yę́ę kóbizhdííniid: “Tʼáá ákótʼéego diné binááł dadííʼnółdíín, áko yáʼátʼéehgo ádaahníłígíí nihá dayooʼı̨́įgo, nihiTaaʼ yáʼąąshdi hólóonii yaa dahaniih dooleeł.” (Matthew 5:16) Áko díí binahjįʼ, dííshjı̨́įdi ałʼąą ádaatʼéego atsiniltłʼish yee ndaalnishígíí chodeiiniilʼı̨́, Internet tʼáá bił. Website hadadiilyaaígíí jw.org éí Jiihóvah Yá Dahalneʼé bibee daʼoodląʼ dóó bindaanish baa dahaneʼ. Ákosh haʼátʼíí jw.org daa biiʼ?

Aláahdi bíndaʼídíkidígíí Diyin God Bizaad biiʼdę́ę́ʼ ííshjání ííłʼínígíí daa biiʼ. Aláahdi baa nitsáhákeesgo bíndaʼídíkidígíí bikʼídíníítaałgo átʼé. Díí tracts nahalingo Achʼįʼ Nahwiiʼná Tʼáásh Nidootʼih? dóó Daneeznánígíísh Tʼááʼaanii Iiná Baa Nídadoolyéełgo Átʼé?, éí 600 dóó baʼaan saad ałʼąą ádaatʼéego Internet daa biiʼ. God bizaad New World Translation ałdóʼ bikʼídíníítááł, éí 130 dóó baʼaan saad ałʼąą ádaatʼéego bee hadadilyaa. Diyin God Bizaad baa íhooʼaahgi áká anídaalwoʼígíí, díí bił ahóóltąʼgo Diyin Bizaad Nanihinitingo Átʼé áádóó Bee Haʼídéesʼı̨́įʼii dóó Chʼééńdzííd! ániidgo ádaalyaaígíí ałdóʼ biiʼ dahólǫ́. Ląʼígóó naaltsoos Internet biiʼ yídííłta dóó yísídííłtsʼįįłgo átʼé. Éí doodaiiʼ łaʼ iinééʼ bikʼiniiʼnilígíí, MP3, PDF, doodaiiʼ EPUB atsiniltłʼish tʼáá bí nitsékeesígíí biijįʼ bééʼdíídlííł. Diné łaʼ bił yáʼátʼéeh lágo tʼáá bí bizaad kʼehjí díkwíigo da łaʼ bá bééʼdíídlíiłgo baa dííniłgo átʼé! Ląʼí ałʼąą ádaatʼéego bílaʼ yee nidadilchidgo yee yádaałtiʼígíí bá naalkidgo bikʼiniiʼnilígíí bá dahólǫ́. Diyin God Bizaad biiʼdę́ę́ʼ saad baa haneʼ bééʼáhoʼdilʼı̨́įgo wóltsʼą́ą́ʼígíí, dóó saad łaʼ hadasdzooígíí bóhoneedlı̨́įgo hachʼįʼ wóltaʼígíí Internetdę́ę́ʼ bééʼdíídlííł. Áádóó danizhónígo daa sinígíí ałdóʼ ákódíílííł áko íininizı̨́ı̨́ʼ góneʼ yídííłtsʼįįł.

Tʼááʼaaníigo Jiihóvah Yá Dahalneʼé baa haneʼ. Tʼáá náhwiistʼą́ą́góó nihindaanishígíí dóó anáhóótʼiʼ haleehgo bideiyíníilníshígíí ałdóʼ biiʼ baa dahaneʼ dóó ndaalkid. Jiihóvah Yá Dahalneʼé bídadéétʼiʼgo baa dahaneʼígíí ałdóʼ tʼáá bił. Nitsaago áłah nídaʼadleehgóó bichʼįʼ dahwéelzhiishgo baa dahaneʼígíí dóó bitsʼádaʼoozʼaʼgóó daʼíníishgi bichʼįʼ áʼdoolnííł doodaiiʼ bichʼįʼ hodoonihjįʼ biiʼ bikʼídíníítááł.

Áko díí bee nahasdzáán bikááʼ diné nináneelʼą́ąjįʼ tʼááʼaaníinii bee daʼdíníildíín. Diné nináneelʼą́ąjįʼ kéyah tʼáá átʼé dah naaznilígíí bikááʼ, Antarcticadi ndi bíká anáʼáwoʼ. Nahasdzáán bikááʼ tsı̨́įłgo Jiihóvah “Bóhólníihii bizaad náás yitʼihgo” bá sodadiilzin, áko éí bee baa haʼniih doo.​—2 Thessalonians 3:1.

• Haitʼéego jw.org biiʼdę́ę́ʼ diné ląʼígóó tʼááʼaaníigo Diyin God Bizaad baa haneʼígíí yídahołʼaah?

• Website hadadiilyaaígíí biiʼ haʼátʼíísh bíhwiidííłʼááł nínízin?