Hesukristu a bisa su siguidónan: “Laga boso lus bria dilanti di hende, pa asina nan por mira boso obranan ekselente i duna gloria na boso Tata ku ta den shelu.” (Mateo 5:16) Ku esei na mente, nos ta hasi bon uso di teknologia moderno, inkluso Internet. Nos website, jw.org, ta e fuente ofisial di informashon online relashoná ku e kreensia- i aktividatnan di Testigunan di Yehova. Kiko tin riba e website akí?

Kontesta di Beibel riba preguntanan ku hende sa hasi. Bo por haña kontesta riba algun di e preguntanan di mas importante ku hende a yega di hasi. Por ehèmpel, e tratadonan Sufrimentu Lo Kaba un Dia? i E Mortonan Por Bolbe Biba? ta disponibel online na mas ku 600 idioma. Tambe bo por haña e Tradukshon di Mundu Nobo na mas ku 130 idioma i vários material di estudio bíbliko, inkluso e buki Kiko Beibel Ta Siña Realmente? i e edishonnan mas resien di E Toren di Vigilansia i Spièrta! Bo por lesa òf skucha hopi di e publikashonnan akí online. Tambe bo por download nan den formato di MP3, PDF òf EPUB. Asta bo por prent un par di página i duna un persona interesá pa e lesa den su mes idioma! Publikashonnan den forma di vidio ta disponibel na hopi idioma di seña. Bo por download lesamentu di Beibel den forma dramatisá, drama basá riba Beibel i tambe músika agradabel pa bo disfrutá di dje ora bo ta deseá.

Informashon tokante Testigunan di Yehova. Riba e website (òf página web) bo ta haña tambe e último notisianan, inkluso videoclip, tokante nos obra mundial, susesonan ku ta enbolbé Testigunan di Yehova i nos esfuersonan pa duna yudansa humanitario. Tambe bo por haña informashon tokante nos binidero kongresonan i kon pa drenta den kontakto ku nos sukursalnan.

Ku e medio akí nos ta laga e lus di e bèrdat bria te na e partinan mas leu di tera. Hende di tur kontinente ta benefisiá di dje, asta esnan na Antártika. Nos ta pidi den orashon “pa e palabra di Yehova por sigui plama rápidamente” den henter mundu, pa e gloria di Dios.—2 Tesalonisensenan 3:1.

• Kon e website jw.org ta yuda mas hende siña e bèrdat di Beibel?

• Kiko bo tin gana di buska riba nos website?