سبق 28
ساڈی ویبسائٹ تے توانوں کیہہ کجھ ملے گا؟
فرانس
پولینڈ
روس
یسوع مسیح نے اپنے شاگرداں نُوں کہیا سی کہ تُسی اپنا چانن لوکاں سامنے چمکاؤ تاکہ اوہ تواڈے چنگے کم ویکھ کے تواڈے اسمانی باپ دی وڈیائی کرن۔ (متی 5:16) ایس مقصد نُوں پُورا کرن لئی اَسی ٹیکنالوجی تے انٹرنیٹ توں پُورا پُورا فائدہ چُک رہے آں۔ اَسی jw.org ناں دی اِک ویبسائٹ بنائی اے جدے وچ یہوواہ دے گواہواں دے عقیدیاں تے کماں بارے معلومات دِتی گئی اے۔ ایس ویبسائٹ تے کیہہ کجھ مِل سکدا اے؟
زندگی بارے ضروری سوالاں دے جواب مِلدے نیں۔ ساڈی ویبسائٹ تے اوہناں سوالاں دے جواب مِلدے نیں جنہاں بارے لوک اکثر سوچدے نیں۔ مثال لئی ساڈی ویبسائٹ تے پرچے ”کیہہ دُکھ درد کدی ختم ہون گے؟“ تے ”کیہہ ساڈے فوت ہو چُکے عزیز دُبارہ زندہ ہون گے؟“ 600 توں زیادہ زباناں وچ موجود نیں۔ تُسی ایس ویبسائٹ تے 130 توں زیادہ زباناں وچ بائبل پڑھ سکدے او۔ ایہدے علاوہ ساڈی ویبسائٹ تے توانوں ”مینارِنگہبانی“ تے ”جاگو“ رسالے دے نویں شمارے تے کئی ہور مسیحی کتاباں وی مِلن گیاں جیویں کہ کتاب ”پاک صحائف کی تعلیم حاصل کریں“۔ کئی کتاباں نُوں آن لائن پڑھیا تے سُنیا جا سکدا اے یاں فیر ایہناں نُوں MP3، PDF یاں EPUB وچ ڈاؤن لوڈ کیتا جا سکدا اے۔ تُسی پاک کلام وچ دلچسپی رکھن والے کسے شخص نُوں اوہدی زبان وچ کجھ صفحے پرنٹ کر کے دے سکدے او۔ ساڈی ویبسائٹ تے اشاریاں دی زبان وچ فلماں وی ہوندیاں نیں۔ تُسی ڈرامے دے انداز وچ بائبل پڑھائی، مسیحی ڈرامے تے دل موہ لین والی موسیقی ڈاؤن لوڈ کر سکدے او تاکہ فرُصت دیاں گھڑیاں وچ ایہناں دا مزہ لے سکو۔
یہوواہ دے گواہواں بارے صحی صحی معلومات مِلدی اے۔ ایس ویبسائٹ تے تُسی دُنیا بھر وچ ہو رہے ساڈے کم بارے خبراں تے فلماں ویکھ سکدے او۔ تُسی ساڈے ریلیف کمتے ساڈیاں آؤن والیاں کنونشناں بارے جان سکدے او، نالے ساڈیاں برانچاں دے پتے وی لبھ سکدے او۔
اَسی اپنی ویبسائٹ دے ذریعے زمین دے کونے کونے تک سچائی دا چانن پھیلا رہے آں۔ ساڈی ویبسائٹ توں دُور دراز تے برفیلے علاقیاں وچ رہن والے لوک وی فائدہ اُٹھا رہے نیں۔ ساڈی دُعا اے کہ یہوواہ خدا دے کلام دا چانن تیزی نال پھیل دا رہوے تاکہ پُوری زمین تے خدا دی وڈیائی ہووے۔—2-تھسلُنیکیوں 3:1۔
-
ساڈی ویبسائٹ لوکاں نوں بائبل دی سچائی سکھن لئی کیویں مدد دے رہی اے؟
-
ساڈی ویبسائٹ تے توانوں کیہہ کجھ ملے گا؟