O Ježiš phenďa peskere učeňikenge: Mi labol tumaro [švetlos] anglo manuša, [kaj] te dikhen tumare lačhe skutki a te [ašaren] tumare Dades, so hino andro ňebos. (Matuš 5:16 NZ) E moderno technika the o internet amenge pomožinel te zvestinel avka, sar phenďa o Ježiš. Pre amare oficijalna webova stranki jw.org arakhena but pal ada, andre soste paťan a so sikaven le Jehovaskere svedki. So ode savoro hin?

Sar odphenel e Biblija pre tumare biblicka otazki. Šaj ode arakhen, so phenel e Biblija pre ada, so o manuša kamen te džanel. Napriklad šaj odoj online arakhes andre buter sar 600 čhiba o letakos Preačhela varekana o trapišagos? the o letakos Šaj ušťen andal o meriben ola, so mule? Hin ode thiš Biblija, savi prethode le Jehovaskere svedki andro buter sar 130 čhiba the aver biblicka kňižki the brožuri, napriklad So šaj sikhľuvas andal e Biblija? the nekneveder amare biblicka časopisi. But lendar šaj genen a šunen online abo scirden peske andro formati MP3, PDF abo EPUB. Thiš tumenge šaj vitlačinen varesave članki andre ajsi čhib, andre savi džanel te genel oda, kaske ada kamen te del. Šaj ode arakhen videji andro but posunkova čhiba. Scirden tumenge biblicka pribehi, so o herci genen, biblicka drami the šukar bašaviben, kaj tumen te el lačhi nalada.

Čačipen, save hine le Jehovaskere svedki. Pre amare stranki hin nekneveder spravi the o videji pal amari buťi, so pes kerel pal calo svetos the savi nudzovo pomoca das ode, kaj kampel. Arakhena ode, kana pes keren o zjazdi the o adresi pre amare beteli.

Amare webova stranki amenge pomožinen, kaj o čačipen te švicinel pal caľi phuv. Le manušen, so dživen pal calo svetos, the pre Antarktida, hin alestar užitkos. Modľinas pes, kaj o čačipen pal o Jehovas te sprindžaren so nekbuter manuša, kaj te ašaras amare Devles. (2. Tesaloničanom 3:1)

• Sar o stranki jw.org pomožinen buter manušenge te sprindžarel o biblicko čačipen?

• So kamľanas te dikhel pre amare webova stranki?