Yesuusi Kiristoosi harunsaanosi togo yiino: “Mannu dancha loosoˈne lae iima noo Annaˈne ayirrisanno gede, xawaabbiˈne mannu albaanni xawo.” (Maatewoosi 5:16) Tenne wonshate yannanke tekinooloje, interneeteno gattukki seekkine horoonsiˈnanni heeˈnoommo. Webisayitenke suˈma jw.org yinanni; tini webisayite Yihowa Farciˈraasine ammaˈnorenna loosinsare mashalaqqe afiˈrate kaaˈlitannote interneetete masimaraati. Qoleno webisayitenke higge affinote. Webisayitenke aana mayi mayi no?

Duuchu manni xaˈmanno xaˈmuwara Qullaawu Maxaafinni qolloonni dawaro no. Webisayitenke aana mannu duucha woyite xaˈmannotera lowonta hasiissanno xaˈmuwara dawaro afiˈratto. Lawishshaho, Qarrunna Shetto Heedhannokki Yanna Dagga Ikka? nna Reyino Manni Addinta Kaˈˈanno? yitanno tiraaktuwa 600 saˈˈanno afiinni interneetete aana afiˈra dandiinanni. Qoleno Qullaawa Borrota Haaro Alame Tiro 130 saˈˈanno afiinni, hattono Qullaawa Maxaafa xiinxallate kaaˈlitanno borro, lawishshaho Qullaawu Maxaafi Addinta Mayyee Rosiisanno? yaanno maxaafanna muli yannara fultinota Agarooshshu Shae, hattono Baqqi Yiiyye! yinanni metseetta addi addi afiinni afiˈra dandaatto. Tenne borro giddo batinye interneetete aana nabbawa woy qaddaˈnoonni qoonqonni macciishsha woy qoonqotenni, Emmi-pii-siiriinni (MP3), pii-dii-effetenni (PDF) woy ii-pebetenni (EPUB) dirrisiˈne adha dandiinanni. Wole agurina tenne borro interneetete aaninni attante hasiˈranno manchira umisi afiinni aa dandaatto! Qoleno batinyu afiinni danqootaho viidiyotenni qixxeessinoonni borro no. Diraamu garinni qixxeessinoonnita Qullaawu Maxaafi niwaawe, hattono fooliishshote yannara macciishshattoha addi addi muuziiqa afiˈra dandaatto.

Yihowa Farciˈraasinere kultannoti adda ikkitino mashalaqqe no. Qoleno alamete doyichora loonsanni heeˈnoommo loosire, addi addi gobbara Yihowa Farciˈraasinera mayi tuncu yiinonsaro, hattono dano iillitanno yannara uyineemmo irdaatire kultannoti muli yanna mashalaqqenna viidiyo webisayitenke aana no. Albillitte heeˈrannohu qoqqowu gambooshshi qaagiishshanna addi addite sinu biiro teessono afiˈra dandaatto.

Tenne doogganni halaalu xawaabbi uullate qacce geeshsha nafa xawanno gede assinanni heeˈnoommo. Baalante ahigurera, wole agurina lowonta xeertote nootera Antarkitiku ahigurera noo manni nafa halaale macciishshanni no. Maganinke ayirranno gede “Yihowa qaali [uulla woˈmate aana] rahe halaˈlanni haˈrara” huuccinanni heeˈnoommo.—2 Teselonqe 3:1.

• Lowo manni Qullaawu Maxaafi halaale afanno gede, jw.org kaaˈlitanni noohu hiittoonniiti?

• Webisayitenke aana maa laˈˈa hasiˈratto?