Ua parau Iesu Mesia i ta ˈna mau pǐpǐ: “Ia anaana . . . to outou maramarama i mua i te taata, ia ite hoi ratou i ta outou mau ohipa maitatai, a faahanahana ˈtu ai i to outou Metua i te raˈi.” (Mataio 5:16) No reira matou e faaohipa maitai ai i te mau ravea apî, mai te Internet. Te faataa ra ta matou reni Internet jw.org i te mau tiaturiraa e ohipa a te mau Ite no Iehova. Eaha ˈtu â?

Pahonoraa Bibilia i te mau uiraa matauhia. E ite oe i te pahonoraa o te tahi mau uiraa faufaa roa a te taata. Ei hiˈoraa, te vai ra te api parau E ore roa anei te mauiui? e E tia faahou iho â anei te feia pohe? i nia i te reni Internet na roto hau atu i te 600 reo. E ite atoa oe i te Huriraa o te ao apî na roto hau atu i te 130 reo, e te tahi mau buka haapiiraa Bibilia mai te buka Eaha ta te Bibilia e haapii mau ra? e te mau Pare Tiairaa e A ara mai na! apî. E nehenehe oe e taio aore ra e faaroo i te taioraa o te rahiraa o teie mau papai i nia i ta matou reni Internet. E nehenehe atoa oe e haruharu aore ra e tuu i te reira i roto i ta oe roro uira, niuniu afaifai aore ra matini roro uira afaifai. Oia atoa e nenei i te tahi mau api no te hoê taata e hinaaro na roto i to ˈna reo. Te vai ra te mau video na roto e rave rahi reo apǎraa rima. E nehenehe oe e rave atoa mai i te mau taioraa Bibilia e au i te teata, te mau aamu Bibilia hautihia e te mau himene navenave o te Basileia ia hinaaro oe.

Haamaramaramaraa mau no nia i te mau Ite no Iehova. Te vai atoa ra te mau parau apî roa e te mau hohoˈa video no nia i ta matou ohipa na te ao nei, te mau fifi i farereihia e te mau Ite no Iehova, e ta matou mau ohipa tauturu. Te vai atoa ra te mau parau faaara no nia i te mau tairururaa e tupu e te mau haamaramaramaraa no nia i ta matou mau amaa.

Maoti teie mau ravea e anaana ˈi te maramarama o te parau mau i te mau vahi atea roa o te fenua. Te fanaˈo nei to te mau fenua rahi atoa i te reira, tae noa ˈtu to Antarctique te vahi toˈetoˈe roa ˈˈe. Te pure nei matou “ia atutu noa te parau a Iehova” e ati aˈe te fenua ia hanahana oia.—Tesalonia 2, 3:1.

• E nafea te jw.org e tauturu ai e rave rahi ia ite i te parau mau Bibilia?

• Eaha ta oe e hinaaro e hiˈo i nia i ta matou reni Internet?